Aunke na e momentonan aki e tendencia ta pa reduccion y esey a keda concretisa den e caida di prijs di gasolin y diesel cu ta drenta na vigor e siman aki, Minister di Economia mr. Geoffrey Wever a laga bon cla cu e prijs di combustibel por bay den tur direccion y ta depende di e desaroyonan cu tuma luga den e luna ey riba e mercado internacional.
A bolbe menciona cu e prijs di gasolin y diesel ta establece a base di e promedio di cada luna y como tal cada dia tin un impacto riba dje. “E desaroyo ta depende di loke ta sosode riba mercado internacional. E ta un mercado di commodities ta hopi volatil. E por bay básicamente den tur direccion. Nos ta spera cu e por sigui positivamente.”
Pa loke ta trata e posibel creacion di un fondo cu RDA cu e funcion di subsidia prijs di combustibel ora cu esaki ta considera necesario, y manera cu e titular di economia mes a menciona algun siman atras, el a indica cu no tin ningun desaroyo nobo rond di esaki.
