Diadomingo Aruba Taekwondo Bond “ARTBO” a organisa un curso di Referee na scol Primario Kudawecha pa tur su miembronan. Master Guillermo Rodriquez referee di dos wega Olimpico tabata presente hunto cu Master Eric Barry di San Nicolas Taekwondo Center referee Internacional.
Dr. Guaicaipuro Jimenez a habri e mainta splicando tur hende presente e meta di e curso net prome cu aña ta den bolter. Master Guillermo Rodriquez a haci tur su esfuerso pa asina por a informa tur hende tocante di e ultimo reglamentonan den Taekwondo. Aruba su Kalendario pa 2020 ta hopi estrecho, mirando cu e prome campeonato Internacional ta dia 18 di Januari 2020.
Master Guillermo Rodriquez a cuminsa cu e curso dunando teoria splicando e reglamentonan haciendo uso di un projector. Despues di merdia a sigui cu e parti di training fisico. Master Guillermo Rodriquez a bisa cu hopi ta kere cu ta facil pa para mey mey di dos atleta cu television y miles di hende den tribuna ta apoya etc. y unda cu tur e focus ta ariba e referee cu mester trata semper di ta concentra pa no haci fout y guia e pelea bon.
E Curso ta bon pa e atletanan tambe pa asina e atletanan sa tur e reglanan bon. Un atleta cu sa tur e reglanan ta bringa hopi mas bon cu ora nan no sa e reglanan y ta steun ariba e coach cu tey pa coach e atleta.
