Minister di Turismo, Salud Publico y Deporte a anuncia dialuna mainta cu den luna di juni Aruba ta ricibi su prome barco crucero bek. Ta trata aki di Celebrity.
Despues di varios luna di combersacion cu lineanan crucero, a yega momento cu awe por anuncia cu den e prome siman di juni lo ricibi e prome barco crucero Celebrity. Ta trata aki di un barco di luho, minister Dangui Oduber a informa den conferencia di prensa di gobierno.
Den e ruta di e biahe maritimo cu ta cuminsa dia prome di juni a inclui Barbados, Sint Maarten, Corsou y Aruba.
Tanto Aruba como e barconan crucero tin nan protocol. Tur hende abordo, pasahero y tripulacion mester ta vacuna. Pasaheronan bou di 18 aña mester tin PCR test. Nan ta bende solamente 50% di nan capacidad locual ta nifica cu e barconan lo tin un averahe di entre 1500 y 2000 pasahero.
Mientrastanto ta sigui den combersacion cu otro lineanan crucero.