Venezolanonan disgusta cu cancelacion di vuelo humanitario, a bay expresa nan mal contento dilanti Consulado di Venezuela na Tanki Flip. Pero di e consulado mes ningun hende a sali pa atende cu nan.
Ta papia aki di mas cu 140 persona.
Un vocero a expresa cu nan presencia na e Consulado ta pa busca un solucion di cancelacion di e vuelo humanitario di dia 20 di maart. “Nos ta aki pa nos derecho, e falta di comunicacion y falta di apoyo di Consulado di Venezuela.”
E vocero a splica cu for di 7 di maart nan ta den un limbo pa loke ta e vuelo, cu a programa pa dia 14 di maart y despues pa dia 20 ultimo. Pa por a biaha mester a saca 75 dollar pa haci e COVID test.
El a recorda cu diasabra ultimo tin un grupo cu hasta a pasa e punto di control unda a pone nan firma un papel na Hulandes, sin splica kico ta su contenido. Casi 12 ora e grupo a keda en espera for di e aerolinea Laser pa loke ta e vuelo, sin cu a haya ni un dato. Esaki a bini te rond di 6’or di atardi ora cu finalmente a informa cu no tin vuelo mas.
El a splica cu no pasobra nan ta sin indocumento aki y cu awor a dicidi di bay, ta trapa riba nan derechonan. “Nos kier bay nos pais, pero tin di nos no tin e recurso pa paga apartamento. Nan mester paga e testnan COVID cu nos mester haci atrobe pasobra esun cu nos a paga a vence. E ta hopi incomodo cu mayoria no tin un luga di keda y ta keda hopi hunto den un forma inhumano,” e vocero a splica.
Un falta di comunicacion y respet total pa e grupo, e vocero a bisa, despues cu nan a dicidi boluntariamente pa bandona e isla. Nos ta responsabilisa e aerolinea LASER pa tur e daño sufri, tanto material como personal.” El a haci un apelacion pa ayudo, pasobra tin hende cu no tin ni luga pa keda, corda pa come. “Basta di abuso, basta di gaña nos y respeta nos derechonan,” un otro vocero a duna di conoce.
Hopi di nan no a acudi, pasobra sea nan ta malo, no tin transporte of tin miedo di represalia for di Warda Costa.
Awo nan no tin comunicacion cu LASER pasobra den e chat di grupo cu tabatin ta reina un silencio of a blokia algun di nan.
E ta puntra pakico a check-in, a paga impuesto y esun COVID, si e permiso di vuelo no tabata firma. Esaki ta e pregunta di mas grandi cu nan tur tin. Mas ainda si a bin descubri despues cu Venezuela tin frontera cera pa un luna pa vuelonan internacional.
Sinembargo un otro ciudadano Venezolano a bisa cu na Venezuela a mobilisa henter e personal di siguridad, dokter, etc., riba diasabra, pero e vuelo nunca a sali. El a sigura cu tabatin tur permiso, pero e problema ta sinta riba e aerolinea cu, aparentemente, su ekipo no tabata cla pa vuelo.
E siguiente paso di e grupo ta pa acudi na parlamento pa pidi pa un solucion.
