Recientemente Michel Frank a gradua como Master in Science den e programa SISSTEM (Sustainable Island Solutions through Science, Technology, Engineering and Mathematics) na Universidad di Aruba.
Frank a presenta y defende su tesis cu ta investiga e factibilidad di uza airships como alternativa sostenibel pa transporta pasahero entre Aruba y Curaçao. E investigacion a analisa entre otro condicionnan di biento, tempo di biahe, emision di CO₂, infrastructura necesario y aceptacion publico.
Pa Frank, kende ta empresario y fundado di Aruba Heat Hot Sauces, e graduacion tabata un logro personal importante. Despues di 30 aña el a bolbe Universidad, completa su Bachelor den Engineering y despues sigui cu su estudio di Master in Science.
“Nunca ta laat pa sigui siña y desaroya bo mes. E trayectoria no tabata facil, pero e logro aki ta mustra cu edad no mester ta un limitacion pa sigui persigui bo metanan,” Frank ta expresa.
Frank tin intencion di adapta su tesis pa publicacion como un articulo cientifico y sigui contribui na discusion tocante solucionnan sostenibel pa Aruba y otro isla den Caribe.
