Hues mr. Debby Angela, kende ta persrechter di Corte di Aruba a duna mas claridad riba e sentencia cu Corte Comun di Husticia, conoci como Hof, a dicta den caso Flamingo contra ex-minister Otmar Oduber. Den apelacion, Hof a impone dos aña di prizon incondicional y a exclui’e durante cinco aña di ocupa un funcion publico of postula pa un organo representativo.
E sentencia di Hof ta considerablemente mas pisa cu e castigo cu Corte den Prome Instancia a dicta na januari 2025. Na e momento ey, Oduber a haya un aña di prizon, di cual 319 dia condicional, ademas di 240 ora di trabou comunitario.
Mr. Debby Angela, ta e hues apunta pa atende cu prensa na Aruba. Cualkier medio cu ta interesa por acudi cerca dje pa un miho splicacion di un sentencia, di un forma mas simpel pa pueblo por compronde. Esey ta loke cu 24ora a haci, unda el a repasa loke ta para den e sentencia di 68 pagina.
Den su splicacion, hues Angela a indica cu Hof a analisa diferente parti di e investigacion Flamingo, incluyendo e dossier di Malmok, e caso di e asina yama funcionarionan spirito y e acusacionnan relaciona cu trato preferencial na sostenedonan politico.
Facebook Live
Caso di funcionarionan spirito
Un parti importante di e condena ta relaciona cu nombramento di dos liaison officer, cu Gobierno di Aruba tabata paga mientras, segun Hof, nan no tabata ehecuta e trabou acorda pa Pais Aruba.
Hof a conclui cu Oduber, den su funcion di minister, a contribui na un construccion pa paga salario for di fondo publico sin cu e personanan concerni realmente tabata traha pa Gobierno di Aruba. Pa Hof, esaki ta constitui fraude contra Pais Aruba.
Hof a aclaria cu un minister tin cierto libertad pa nombra personanan di confiansa. Sinembargo, e libertad administrativo ey no ta extende te na e punto cu Gobierno ta paga salario bou di un contrato di trabou, mientras e persona no ta cumpli cu e funcion acorda.
Trato preferencial na sostenedonan politico
Otro parti importante di sentencia ta e manera cu Otmar Oduber y su co-acusado Aisha Esser a trata personanan cu tabata activo den campaña politico di Oduber y partido POR.
Segun Hof, e evidencia, incluyendo administracion, declaracionnan y combersacionnan di WhatsApp, a demostra cu cierto sostenedonan politico a haya un trato diferente compara cu otro ciudadano cu tabata busca ayudo pa haya trabou.
Hof a considera proba cu Oduber y Esser a haci esfuerso pa yuda diferente persona haya un trabou na entre otro Serlimar y DOW. Den algun caso, Hof a establece un relacion entre e ayudo politico of trabou haci durante campaña y e trato preferencial cu nan a ricibi despues.
Segun e splicacion di hues Angela, funcionario y mandatario publico mester actua cu integridad y tuma decision sin laga interes personal of preferencia politico influencia nan. E conducta demostra den e caso aki a afecta e separacion necesario entre politica y aparato gubernamental.
Abuso di poder den dossier Malmok
Den e parti di investigacion relaciona cu reparticion di tereno na Malmok, Hof no a considera fraude completamente proba. Sinembargo, Hof si a conclui cu Otmar Oduber a abusa di su funcion door di interveni den e proceso y duna prioridad na personanan cu e conoce.
E sistema na DIP tabata basa riba e principio “first in, first out”. Segun Hof, Oduber a pasa banda di e procedura normal pa influencia e trato di peticionnan specifico.
Pesey, aunke Hof a absolve Oduber di fraude den e parti aki, el a considera abuso di poder como proba.
Integridad di cargo ministerial
Hues Angela a enfatisa cu e funcion di minister ta exigi transparencia, integridad y respet pa proceduranan oficial. Un minister no por uza su posicion pa beneficia amigo, conoci of sostenedo politico riba otro ciudadano.
Hof a considera cu Oduber a ocupa un posicion di poder y confiansa, pero a uza e posicion ey pa influencia decisionnan gubernamental. Esaki a causa daño na confiansa cu comunidad mester por tin den Gobierno y den sistema politico.
Na momento di determina e castigo, Hof a tene cuenta cu e echonan a sosode algun aña pasa y cu e caso a genera un cantidad grandi di publicidad. Sinembargo, gravedad di e delitonan y e daño na integridad di administracion publico a pisa mas fuerte.
“Corupcion ta inaceptabel y ta conduci na castigo severo”, ta e mensahe cu Hof a presenta den su sentencia.
Dos aña di prizon y cinco aña di exclusion
Finalmente, Hof a condena Otmar Oduber na dos aña di prizon completamente incondicional. Ademas, durante cinco aña e no por ocupa un funcion publico ni postula pa un puesto den un organo representativo.
E sentencia no ta igual na tur acusacion presenta contra Oduber. Hof a absolve’e di fraude den dossier Malmok y di soborno pasivo den un parti di e caso di funcionarionan spirito. No obstante, Hof a considera fraude contra Pais Aruba, soborno y abuso di poder suficientemente proba pa impone un castigo di prizon di duracion considerabel.
Otmar Oduber a anuncia cu e no ta di acuerdo cu e sentencia y cu e lo sigui e proceso via cassatie. Den cassatie, Corte Supremo no ta trata tur evidencia di nobo, pero ta controla si Hof a aplica ley corectamente y si e sentencia tin suficiente motivacion huridico.
Mensahe cla pa politiconan di Aruba
Na final di e entrevista, hues mr. Debby Angela a contesta e pregunta tocante cua mensahe Hof kier manda na politiconan di Aruba cu e sentencia aki.
Segun Angela, Hof su mensahe ta cu un mandatario publico mester actua cu integridad, transparencia y imparcialidad. E hecho cu practicanan politico por a bira comun of cu hende ta considera nan parti di cultura politico di Aruba, no ta nifica cu nan ta permiti legalmente.
Un minister tin libertad pa formula su maneho y tuma decision, pero e libertad ey tin limite. E no por pasa banda di proceduranan oficial, duna trato preferencial na sostenedonan politico ni uza aparato gubernamental pa recompensa personanan cu a yuda durante campaña.
Hof kier laga cla cu tur ciudadano mester haya un trato igual cerca Gobierno, sin importa su afiliacion politico, amistad of relacion personal cu un minister. Un politico no por considera un funcion publico, un puesto di trabou of un tereno di Gobierno como un instrumento pa beneficia “nos hendenan”.
Angela a splica cu e castigo tin tambe un efecto di prevencion general. Esaki kiermen cu sentencia no ta dirigi solamente na Oduber, pero ta manda un señal na tur mandatario y politico cu abuso di poder y corupcion no ta aceptabel y cu Corte lo castiga conducta asina severamente.
E mensahe central di Hof ta cu un posicion politico ta trece poder, pero tambe un responsabilidad grandi. Ken cu ocupa un funcion ministerial mester proteha integridad di Gobierno y confiansa di pueblo y no por uza e posicion pa interes personal of partidista!
