Ya for di oranan tempran di anochi un publico grandi a sa di acudi riba cayanan di Aruba pa asina presencia un di e paradanan mas luhoso di nos Carnaval, cual ta e Lighting Parade. Un total di 10 grupo a sa di bin cu nan diseño y creatividad, y naturalmente yena cu luz y luho. E tabata un anochi hopi colorido y excepcional.
Tambe bandanan a sa di trece lo miho p’adilanti poniendo asina e participantenan den un ambiente unico. Gruponan cu a participa tabata TOB cu e tema di Rise of the Phoenix, Royal Carnival Group cu Wiches and Wizards, Empire Carnival Group cu Garden of Eden, OPC Carnival Group cu Aruban Heritage, Los Laga Bai Carnival Group cu King Robert’s Army, Champagne Carnival Group cu Wings of Hope, Dushi Carnival Group cu Jewels of the Caribbean, Pink 4 Life Carnival Group cu Zulu Warriors, Infinity Carnival Group cu Voyage to India y por ultimo Chelo Loco.
Na final BMW a sa di anima e last lap, cual tabata masivo. Sigur un parada hopi largo cu un cantidad grandi di participante. Un cos tin cu remarca, cual un di e participantenan mes a bisa, otro siman, nan ta bay bin cu tur cos cu nan tin, asina ta, Aruba prepara, pasobra e proximo paradanan, lo kibra tur expectativa pa e temporada aki.
