Prome Minister ta celebra hunto cu nos grandinan di Stichting 60+ Kibrahacha

Yegando mas cerca di fin di aña, diferente departamento y fundacionnan ta extende invitacionnan na Prome Minister Evelyn Wever-Croes pa comparti cu nan e celebracion di fin di aña. Pa Prome Minister esaki ta un honor grandi y lo a desea y percura di por atende cada un di nan.

Dialuna mainta Stichting 60+ Kibrahacha a honra Prome Minister cu un invitacion pa asina e mandatario comparti cu nos dushi grandinan nan celebracion di Pasco. Club Kibrahacha ta un centro di actividad pa hendenan di 60 plus y ta organisa actividadnan di dialuna pa diabierna pa nos grandinan for di tur districto di Aruba.

Na su jegada den e ballroom di Hilton Hotel e mandatario a wordo ricibi pa Sr. Bert Kaamsteeg y tambe director di Stichting 60+ Kibrahacha Sr. Jeffrey Matos.

Prome Minister den un discurso a gradici e stichting y nos grandinan bisando cu ta danki na nan esfuerso cu nan a crece e pais aki y a brinda nos un dushi luga pa nos por lanta nos yiunan y nan yiunan. E sacrificio aki di nos grandinan no a pasa voorbij sin cu a tuma nota y pa cua motibo tambe Prome Minister a garantisa nan cu cuido general di nos grandinan tin un luga hopi importante den e programa di nos partido entre otro cuido di salud di nos grandinan, vivienda pa nos grandinan, alivio di belasting pa nos grandinan, suma di pensioen, edad di pensioen y traha despues cu yega e edad di pensioen. Esakinan ta temanan cu tin atencion di Gobierno di Aruba totalmente.

Prome Minister ta asegura nos grandinan cu nan lo bay gosa di e frutonan di e cambio cu Gobierno di Aruba lo trece pa nan.

E mandatario a termina su discurso deseando nos grandinan pa nan disfruta di e temporada di mas bunita di aña hunto cu nan sernan stima den paz, harmonia y felicidad. Y pa esnan cu tin famianan cu a bay laga nan atras, Prome Minister a encurasha nan pa nan laga e bunita recuerdonan yena nan curason cu alegria.

Na e ocacion aki tambe Stichting 60+ Kibrahacha a reconoce sra Juliana Henriquez como miembro Honorario di Club Kibrahacha kende tin hopi aña trahando cu e fundacion aki.
Pabien na Stichting 60+ Kibrahacha y tur su boluntarionan cu otro excelente celebracion di Pasco pa nos dushi grandinan. Mas di e bon ambiente aki por wordo aprecia riba e fotonan adhunto.