Tur aña riba 18 di maart Aruba Juniors ta reconoce baluarte den mundo di softball. E aña aki a scoge dos baluartenan Ferdinand Flanders y Gordon Toussaint
Manera tur mucha, Ferdinand Flanders, conoci como Ferdi, a cuminsa hunga bala cu su amigonan den bario na San Nicolas. Cu su diescuater aña el a drenta e team di Don Bosco division Junior League cu tabata maneha pa coach Baly. El a hunga dos aña Cu Don Bosco Juniors League. Aki ta unda Gabby Illidge (qepd) kende tabata Manager/Player di Schlitz a scout Ferdinand y a puntr’e pa e bin hunga den Schlitz dobel A. Cu Apenas 16 aña Ferdinand a subi dobel A y ta topa hungadonan estelar manera Elston Simmons y Buga Blijden. Despues di dos aña den Schlitz e ta bay Sint Maarten pa trabou unda e ta keda tres aña. Den e tres añanan aki e ta hunga baseball dobel A pa entre otro Sea View Hotel y GeBe.
Bek na Aruba Ferdi ta bolbe hunga cu Gabby Illidge pero e biaha aki den Amstel cu despues ta cambia di nomber y ta bira White Label. Den White Label el a hunga cu Charles “Pepitone” Flanders, Toby Abraham y James “Bubblegum” Hazel entre otro. Ora cu White Label a desintegra el a pasa hunga pa Heineken. Den Heineken el a forma e staf di picheo hunto cu entre otro Antonio Gomes y Buchi Boasman. Despues di un trayectorio di 29 aña Ferdinand ta retira di baseball cu 45 aña di edad. Ora e manager di Sugar Kings a tende cu Flanders a retira di baseball, a busc’e mes ora pa join su team como all around player. Cu 50 aña e ta pasa hunga den e team di San Nicolaas Sluggers y despues difunto Bubeis Gomez ta hib’e Astros. Na 2013 Aatje Williams ta puntra Ferdinand pa bin hunga cu Aruba Juniors. E ta hunga un aña den Liga 50 y despues ta pasa pa Liga 60. Ferdinand ta conoci como un hungado cu ta hunga diferente posicion den tanto outfileld como infield. Su bate Semper ta on y ta bati riba 300 di averahe tur aña.
Otro persona hopi aprecia den e mundo di softball ta e conocido DJ Gordon Toisaint
Gordon semper a gusta scucha musica como tal e tabatin un bon sistema di zonido na cas. Tur cos a cuminsa na 1975 ora cu un ruman di Gordon a gradua como verpleegster y el a pidi Gordon pa bin cu su sound system pa toca durante un encuentro cu el a organisa. E sistema di zonido no a bay cas mas pasobra ta tur fin di siman e amiganan a keda puntr’e pa toca na nan cas. Esaki a dura shete siman. Despues Gordon a cuminsa toca n’e fiestanan den Dominica Club na Tarabana y tambe ora tabatin wega di domino diasabra y diadomingo. Despues Gordon a haya un contract cu Divi Divi Hotel como entertrainer y DJ.
Por ta hopi no sa, pero Gordon a hunga softball pa DOW Pampers hunto cu Victor Albus y Juan Martijn entre otro colega di DOW. E tabata hunga e posicion di centerfield. Cu DOW el a hunga varios biaha na Corsou. Na 1981 Ronny Gomez, kende ta un organisado di torneo di softball, a invita Gordon pa un diadomingo bin pone musica na su torneo na veld di Montaña na Noord. Gordon ta conoci pa ti un repertorio di musica masha amplio y hopi varia. Door di su experiencia como entertainer na Divi Divi el a bin na e idea pa pasa e weganan durante torneo. Eynan el a topa cu difunto Ten Ten Tromp kende a join Gordon cu locucion di e weganan di softball.
No a dura hopi cu Gordon a bira un atraccion n’e weganan di softball entreteniendo e publico cu tabata bin veld. Esaki a crea un ambiente diferente pasobra e locucion tabata cu hopi joke pero toch serio. Gordon a bira e homber di ambiente na e torneonan di softball. No tabatin un veld na Aruba cu Gordon no a toca. Pa un torneo ta exitoso Gordon mester t’ey cu su musica y su mike. Dado momento e trabou a bira asina exigente cu e mester a busca dos mucha pa yud’e. Raymond Jansen cu Mariano Thiel a join e team di Gordon como DJ. Esaki a duna Gordon espacio pa dedica ful tempo na locucion y entretene e fanaticada grandi cu tabata bin veld.
E veldnan di Flatstone bieu, Alto Vista y despues Kibaima na Tanki Leendert tabata rondona cu hende ora Gordon entretene. Na Kibaima e ambiente tabata sigui despues di wega cu bailamento cu su música. Tambe Gordon a toca varios biaha pariba di brug na Veld di La Fama y Arandas na San Nicolas. Comienso di añanan 90 Famia Gomez a lanta veld di Astros na Pavia. Astros a bira e cas nobo di Gordon. Pa varios aña Gordon a toca y entretene e weganan local e internacional ey riba. Despues cu a desmantela e veld di Astros, el a entretene na Veld di Caribe pa varios aña mas. Por bisa cu Gordon a entretene durante weganan local, internacional y Antiano. Tambe Gordon a inspira varios persona pa cuminsa toca na e veld- y fiestanan di famia.
Banda di su trabounan riba veld como entertainer, e tabata presidente di Survival Softball Team como 15 aña. E aña cu Survival a gana Astros y a titula campeon di Copa ABC, Gordon a retira como presidente di e team.
Diasabra awor riba 18 di maart lo rindi homenahe na e dos personanan aki na Aruba Junrios pa 2:00 pm. Amigo y amantenan di softball ta bon bini pa celebra cu nos Dia di Himno y Bandera den gran forma. Bar y cushina manera semper lo ta bon surti.
