Despues di varios aña di ta inactivo, e team di water polo di Aruba Dolphins aña pasa a haya un bida nobo ora cu algun hungador bieuw a dicidi di dal un wega amistoso hunto cu e muchanan jong.
Esaki a bai asina bon cu mesora a dicidi cu awor ta e momento perfecto pa lanta water polo bek na Aruba. Durante un aña a train intensivamente varios viaha pa siman pa por yega na un nivel cu miras pa participa na un torneo. Contactonan a wordo hasi cu Curacao y Bonaire pa asina sondea e posibilidad pa yega na un palabracion pa un torneo. Na comienso di 2018 a keda dicidi cu lo tene e torneo aki dianan 1-2-3 di juni 2018 na Aruba cu e nomber ABC Water Polo Cup 2018. Durante 2 dia e equiponan Curacao Orcas, Bonaire Barracudas y Aruba Dolphins a hunga un round robin di 6 wega pa asina saca e 2 equiponan cu mas punto pa e wega final Diadomingo mainta.
Diasabra anochi a keda determina cu Bonaire Barracudas y Aruba Dolphins lo hunga e wega final riba Diadomingo. E expectativanan pa e wega finala tabata halto y e tribuna na Pisina Olimpico Roly Bisslik a yena di publico cu tabata tin basta tempo sin mira un partido di water polo. E score final a keda 10-5 pa e equipo di Aruba Dolphins y asina a confirma cu water polo ta bek pa keda. Directiva di Aruba Dolphins ta gradici Curacao Orcas y Bonaire Barracudas pa nan participacion na e ABC Water Polo Cup 2018. Tambe nos gradicimento ta bai na nos sponsornan F&M Cleaning i Zeerovers cu a hasi e torneo aki posibel. Si bo ta interesa den join Aruba Dolphins water polo, bo por tuma contact cu nos via email [email protected]
