Diaranson awor, dia 11 di januari 2023, Aruba lo conoce e finalistanan pa Aruba Caiso & Soca Monarch 2023.
E anochi final di Aruba Caiso & Soca Monarch lo tuma luga riba Diasabra, 28 di januari 2023. Segun e reglanan di e festival, un total di 27 Soca y 7 Caiso lo competi durante e anochi final.
Musiconan, prensa y pueblo en general ta cordialmente invita pa pasa un rato ameno riba diaranson awor na Patio 15, for di 7:00pm te cu 9:00pm, pa haya sa y pa apoya esunnan cu lo sigui pa e ultimo tanda di Aruba Caiso & Soca Monarch 2023.
Desde comienso di aña y mas ainda, durante e Parada di Flambeu, por a tuma nota cu e producionan nobo a cuminsa resona riba caya y na radio. Esaki tabata netamente e meta: ahusta e temporada di pre-final cu algun luna prome cu e anochi final.
Asina, tur cantica cu a participa, por a zona na radio y nan video clip distribui via social media.
