Jorien Wuite, ta orguyoso cu tin posibilidad pa vota pa eleccion di Eerste Kamer, esaki ta algo nobo y sigur algo cu mester tene cuenta cu ne mirando cu hopi di e temanan tocante Rijkswet tin un impacto riba e islanan den Caribe Hulandes.
Antes esaki no tabata posibel. E derecho aki ta posibel p’e hendenan cu a biba minimo dies aña na Hulanda pero cu no ta residencia mas na Hulanda.
E fecha lo ta 15 di maart, pero pa participa mester registra prome cu fin di januari. Si busca riba Google lo por haya e formulario pa registra y tambe lo por haya tur informacion necesario. Wuite ta haci un yamada na tur persona cu a biba dies aña na Hulanda pa haci uzo di e derecho di vota. Ademas, el a remarca cu tin hopi Hulandes aki na Aruba cu tin e derecho di vota. Tin hopi tema di importancia cu lo pasa door di Eerste Kamer, p’esey mester haci uzo di e derecho.
No ta nada straño pa un politico for di Hulanda haci propaganda pa tipo di eleccion asina, segun Jorien Wuite. Mester tene cuenta cu aki ta caminda ta aproba cierto Rijkswetten cu di un manera of otro tin impacto riba e islanan den Caribe, den e caso aki Aruba.
Su mensahe no ta pa vota pa D66, sino mas bien pa reenforsa e democracia den Caribe Hulandes. “Haci uzo di e derecho y no lag’e pasa bay”, el termina bisando.
JORIEN WUITE
Jorien Wuite tin 56 aña y ta naci na Den Haag. E tin un vinculo fuerte cu Sint Maarten, ta patria di su mama. Hunto tabata biaha regularmente pa bishita nan famia riba e isla. Su educacion ta den ciencia di salud na Rotterdam. Despues el a bay biba na Sint Maarten cu su famia, unda el a bira director dje sector di asuntonan di salud, secretaria general di dos ministerio, minister interino y eventualmente minister plenipotenciario. Tambe e tabata miembro di directiva di Prins Bernhard Cultuurfonds Caribisch Gebied y recientemente a nombr’e como presidente di fundacion Black Achievement Month.
El a regresa Hulanda y a bay riba lista di partido D66, di cual awo e ta den Tweede Kamer. “Den Reino Hulandes ta comparti e pasado y futuro. Si e crisis di Coronavirus a mustra algo, ta con nos destino ta conecta cu hende rond mundo.” Su balornan fundamental ta “conecta, cu wowo pa husticia, decision, igualdad, honestidad, cooperacion, resultado social y innovacion.”
