Recientemente e parlamentario miembro di e fraccion di partido MAS, Aquannette Gunn, a manda varios peticion pa reunion riba diferente tema.
Tur e peticionnan aki el a haci dia 31 di januari ultimo. Un di nan tin di haber cu e scol Dornasol. E tema ta relaciona cu e leiding di e scol aki, pa cu e maneho. E kier sa mas di e proceso y ehecucion di nan maneho pa cu cuido di e studiantenan. Esaki ta un scol special pa alumnonan cu mester di guia special.
El a haci e peticion aki na Shailiny Tromp, kende ta presidente Comision Fiho pa Enseñansa. E kier sa con ta maneha Cluster-4 su cambio pa enseñansa avansa, durante e ultimo cinco añanan.
Tambe el a pidi un otro reunion riba e tema di Dornasol mes, pero cu presencia di Minister di Enseñansa y Inspeccion di Aruba, riba control di calidad na Dornasol y con a para cu e consehonan duna na juli, 2023, riba Dornasol.
Dia 31 di januari tambe Gunn a manda su di tres rappel cu e ta manda pa Darlaine Guedez-Erasmus. Esaki ta relaciona cu su peticion pa yama un reunion hunto cu e internistanan specialisa den malesa di hende grandi y Hunta di Directiva di dr. Horacio Oduber Hospital.
Gunn den luna di october caba a manda un carta pa Guedez-Erasmus y mirando cu no ta haya reaccion a dicidi di manda un recordatorio (e di tres) pa e presidente di Comision Fiho pa Asuntonan di Famia y Cuido di Grandinan. “Mi ta spera cu awo si mi por haya bo cooperacion pa yama e reunion aki,” Gunn ta bisa den su peticion.
Un otro peticion cu Gunn a haci dia 31 di januari, y a adapta esaki riba 2 di februari, ta esun pa Alvin Molina, kende ta presente di e Comision Fiho pa Asuntonan di Husticia, Integracion y Peticionnan.
E ta pidi un reunion cu presencia di sra. Sharine Luydens di Censo pa duna mas informacion posibel riba e cambionan den Kiesverordening y e eventual consecuencia y implicacion di e cambionan aki.
