Dia cu corte a trata e caso contra Anderson Figaroa di 34 aña, tres siman pasa, e tabata den libertad, mientras cu e amigo cu a bisa cu e arma ta pertenece na dje tabata cera. Un di e acusadonan den e caso ey, el a declara Jairo Morales liber y a declara Shawn Murray culpabel. Den e caso di Anderson Figaroa e no a tuma un decision mesora y pone e fecha di 12 di april pa e acudi bek na corte pa scucha cual ta e decision den su caso.
E acusacion contra dje tabata complice den posesion di arma di candela pa cual a pidi un castigo di 24 luna. E delito ey el a comete ora cu el a caba di sali for di KIA unda el a sinta algun aa pa un delito di violencia. Di tratamento di e caso fiscal a pidi cu si declar’e culpabel, ta pidi un ordo di detencion di inmediato. Pero esey no tabata necesario, pasobra e mesun fin di siman di tratamento di su caso, a detene durante un razzia.
Polis a bay controla e auto den cual e tabata pasobra a haya melding cu nan ta causa problema. E tres acusadonan tabata den e auto hunto cu amiga di Figaroa. Polisnan a bay den accion ora cu a mira un di e hendenan den e auto trata di sconde algo. Y berdad den e auto a topa cu un 9 mm mas droga, pildo, etc. Tur esakinan Shawn Murray a bisa cu ta pertenece na dje.
Tabatin sospecho cu e arma ta pertenece na Figaroa, pero Murray a tuma tur culpa riba dje. Inicialmente el a bisa cu e sa warda arma pa Figaroa pero despues a hala atras.
Sinembargo hues si a haya cu Figaroa ta culpabel di posesion di arma di candela. El a lesa varios splica cu tin para den ley cu por declara e homber aki culpabel di e delito menciona. Pero tambe cu e video cu fiscal a mustra por mira con Murray ta filma di patras den e auto e arma y dado momento el a bira wak. El a uza tambe declaracion di e mesun Murray cu e ta algo al estilo di bodyguard di Figaroa pa cual e ta cana arma.
Loke cu a hunga un rol den e castigo ta cu no ta prome biaha cu Figaroa ta haya su mes envolvi cu husticia. Pa colmo, durante su tempo di prueba. A dun’e 18 luna y ordo di detencion, aunke e ta cera caba.
Ademas di e castigo aki, e tin un otro investigacion andando contra dje pa su ultimo detencion.
