Diasabra ultimo a tuma luga St. Clair College, Canada, su prestigioso “31st annual Alumni of Distinction Ceremony.” Ursell Arends, Minister di Transporte, Integridad, Naturalesa y Asunto di Adulto Mayor y vice-minister presidente di Aruba, a ricibi su premio como un di e seis alumni cu a destaca profesionalmente den nan carera despues di nan estudio na St. Clair College.
Durante su discurso, el a gradici famia Hearn pa e sosten durante y despues su tempo studiando na Windsor. Tambe el a manda palabra di gradicimento pa su mama, tata y ful su famia cu siguramente ta sumamente orguyoso di dje.
E mandatario a biaha priva, riba su propio costo, hunto cu su famia. Na e evento special aki, e tabata compaña pa su casa y mayor.
St. Clair College ta situa zuidwest di Ontario, na Canada. E ta funda na aña 1966 pues tin 58 aña di existencia. Lema di e scol ta “Start Here. Go Anywhere”. E scol ta conta cu 264 docente y personal administrativo pa maneha 6933 alumno.
Ursell M. Arends a nace na Santa Cruz. Na aña 2000 el a bay studia Business Administration & International Business Management na Merca y Canada. Desde aña 2007 e ta trahando y a crece den su funcion y yega te na Operations Director na La Quinta Beach Resort. Entre aña 2016 y 2018 e tabata presidente di Aruba Timeshare Association (ATSA). El a funda Partido Raiz na aña 2017 y den su prome salida a logra 1433 voto riba su nomber. Den eleccion na juni 2021, Ursell Arends tabatin 1939 voto personal, cu ta representa un aumento di 35%.
