E dos sospechosonan di husticia, esta Gerald Olivir y Jonathan Ridderstap, a recobra nan libertad bek ayera. For di Bispo di Pasco nan ta encarcela den KIA pendiente e investigacion andando pero fiscal no a mira necesidad pa wanta nan den prizon mas. Probablemente ambos a coopera di tal forma cu husticia, cu no tin sentido pa wanta nan cera mas. Vocero di Ministerio Publico a ripiti cu no por descarta cu lo tin mas detencion den e caso aki, cu husticia a yama “Wanglo”.
Ambos sospechoso ta ex-trahado na Directie Volksgezondheid Aruba (DVG) y tabata deteni desde dia 13 di december. Parce cu, den e prome dianan, a opta pa cera nan cu cierto limitacion, pa evita cu nan dos tin comunicacion cu otro y tampoco pa tin comunicacion cu otronan. Husticia kier a evita cu ambos ta bay cuminsa manda mensahe pa otro(nan) pa prepara nan storia ora detene nan den e mesun caso aki. Na un prome instante a prolonga nan detencion, ora a manda nan KIA, cu un maximo di 16 dia mas. Pero, como cu nan a coopera cu e recherchenan, a opta pa laga nan bay cas numa.
Falsificacion di hopi prueba di vacuna
No por menciona un cantidad exacto, pero e keho cu DVG a haci na Landsrecherche ta referi na hortamento di un rol grandi di stickernan cu ta uza cu fecha cu a tuma e vacunanan, cu ta bay riba e carton emiti door di gobierno di Hulanda. E grupo aki, a faya cu nan trabou y awo a hinca gobierno di Aruba y DVG den un posicion masha incomodo cu Hulanda pasobra no ta confia nan pruebanan mas.
Ta pensa cu entre tres pa cuater mil prueba di vacuna ta falsifica. Ta papia di falsificacion pasobra e portado di e prueba di vacuna nunca a vacuna, ni e prome, pero tampco e di dos vacuna, pero si tin un prueba di vacuna den su poder indicando dos supuesto fecha cu el a tuma e vacunanan. Ta menciona cu specialmente trahadonan di un compania estatal di gobierno ta entre e clientenan cu a opta pa cumpra un prueba falso, en bes di haci un prueba legal y asina proteha nan mes contra Covid.
E investigacion a cuminsa cana su caminda
Ta for di luna di october caba a cuminsa manda trahadonan cas, pa motibo cu a nota cu tabatin iregularidadnan na pia di trabou. A crea un procedura basa riba un protocol, conoci como un Standard Operations Procedure, cu tur trahado mester tene nan mes na dje. Asina a stipula cu e mesun persona cu ta “check in” e pashent no por ta e mesun cu ta “check out” e pashent despues di a tuma su vacuna. Asina ta evita fraude. Pero, den bida real e grupo aki tabata “haci y deshaci” y ora hala nan atencion, nan tabata bisa e superiornan cu nan tin contact direct cu minister of tabata menciona mesora nomber di un tal “Jury” cu ta encarga cu e Health App di gobierno.
E mal comportacion a continua te ora cu a haya nan ta manda algun cas, pero en bes di kibra contract, ainda a purba “salba nan pan” door di manda nan traha na aeropuerto. Pero ey e fiesta a sigui, cu consecuencia cu mester a kita nan di trabou, aunke a duna nan cada un, un carta di recomendacion bisando cu nan a haci un tremendo trabou na DVG.
Ken e sospechosonan aki ta?
E prome dos sospechosonan cu ta cera desde 13 di december ta Gerald Olivir y Jonathan Ridderstap, conoci tambe como DJ Zenox. E prome a traha hopi aña den casino y ora cu nan a stop su contract, el a rabia masha y disgusta cu tur hende, incluyendo cu e minister mes. E no a keda contento cu e no tabatin entrada mas y a laga sa cu locual e hendenan ta papia ta co’i kens. E di dos ta meti den e mundo di entretenimento y ta toca den fiesta. Awo e tin di confronta acusacionnan serio den su contra, pa trece siguridad nacional di nos pais na peliger.
Coruptonan amateur
Fuentenan yega na e investigacion a sigura na nos cu e sospechosonan ta masha amateur den nan trabou y hasta a bira “slordig” despues di tempo. E negoshi clandestino tabata draai asina bon cu casi nan a pensa cu nunca lo por gara nan. Asina nan tabata pidi nan clientenan pa transferi e suma di placa riba nan cuenta di banco, sin tene cuenta cu esey ta un prueba palpabel cu awor ta manca nan den e caso grandi aki. Pero ta di cuanto placa nos ta papia di dje aki? Nos fuente a sigura di “miles di florin”, specialmente si tene cuenta cuanto hende ta canando rond cu un prueba falso asina.
Vacuna na Aruba
Di acuerdo cu estadistica oficial di Directie Volksgezondheid Aruba (DVG), ya un total di 5704 ciudadano a haya nan prome vacuna y 78.809 a ricibi nan di dos vacuna caba. Di e totalidad aki, 1027 ta adultonan mayor di 60 aña di edad cu a tuma nan prome vacuna y 21.884 cu a tuma nan di dos vacuna caba.
Tocante e caso Wanglo
Algun dia pasa Ministerio Publico a confirma cu nan a habri un investigacion bou di e nomber di “wanglo”. Ta investiga posibel iregularidadnan rond di procesonan di test di vacuna y e pruebanan di e testnan haci. A confirma dos detencion caba y cu tin bista riba algun posibel sospechoso mas.
