“Manera AHATA a adverti algun siman pasa, un ola nobo di COVID, cu cantidad grandi di caso nobo tur dia, a resulta den e nivel mas halto di alerta di CDC. Esaki tin su efecto negativo pa nos economia pa motibo di cancelacionnan den sector turistico, specialmente di gruponan”, asina Tisa LaSorte-Henriquez, CEO di Aruba Hotel and Tourism Association (AHATA) a contesta riba un prome reaccion despues cu Merca a pone Aruba atrobe riba lista cora pa biaha. E categoria cuater aki, di color cora, ta mas bien un advertencia di gobierno Mericano pa ciudadanonan no biaha pa Aruba, por lo menos no si tin un motibo urgente.
“E sector di acomodacion ta experienciando e efecto den reservacion pa januari y februari. Anteriormente a experiencia cancelacion na luna di December tambe pa motibo di e rekisito adapta di Aruba pa bishitante di Merca test dentro di 2 dia prome cu biaha pa nos isla”, asina e ehecutivo di AHATA a aclaria. Nan tin un bista global di e situacion pasobra tur hotel y otro acomodacionnan ta raporta nan cifranan na AHATA. Asina nan por mira con cancelacionnan ta afecta e nivel di ocupacion cu a cuminsa bon pa e temporada halto aki, pero cu awor ta conociendo reto pisa debi na e presencia di e virus memey di nos.
Tisa LaSorte a termina bisando cu “Mester agrega cu AHATA tin comprencion pa e necesidad di e rekesito nobo pa bishitante di Merca. AHATA ta analisando e cifra di ocupacion hotelero y lo publica resultado di december y proyeccion nobo pa januari y februari pronto.”
