Por a ripara cu diamars DIP a para e trabao di ampliacion di beach di Embassy Suites by Hilton Aruba Resort. Riba esaki, Prome Minister mr. Evelyn Wever-Croes, a bisa cu e situacion di Embassy Suites, te asina leu cu e sa, ta cu un trabao lo a cuminsa cu no tabata segun regla, ni ley, ni permiti y esey mester a para. E reglanan pa loke ta nos leynan ta hopi duidelijk, segun e prome mandatario y ta conta pa tur hende.
E problemanan exacto di Embassy y di e asunto di e beach ta un asunto cu ta den man di e profesionalnan, segun e mandatario. Un cos cu Wever-Croes sa cu no tin ningun hotel cu beach priva na Aruba. Esey no tin ni ta duna ningun hende tampoco.
Tin di compronde cu a para e trabao pa algun dia p’asina yega na otro pa loke t’e diferencianan di opinion cu por tin, falta di informacion por ta. Ta bon pa laga nan yega na otro y a duna como compromiso cu den dos siman lo tin contesta riba e peticionnan.
Wever-Croes a sigui splica cu ta trahando riba esaki si. Minister Dangui Oduber tambe ta envolvi, pasobra e ta wak e for di un otro angulo. Un angulo cu tin hopi presion riba por ehempel Eagle Beach cu ta yenando y tambe Palm Beach. Si tin e posibilidad pa habri un otro beach, Oduber ta na fabor di esaki. Aworaki e profesionalnan ta hunto y mira si esey por of e aspectonan mas tanto di medio ambiente y naturalesa, con importante y cuanto peso tin di duna esaki.
INVERSION A TUMA LUGA Y TUNNEL TA TRAHA
E inversionistanan a inverti y a traha un tunnel. Na prome instante a priminti cu nan lo haya un beach. Sinembargo awo cos a cambia. Riba esaki Wever-Croes a comenta cu mester tene cuenta cu ley. Por tin promesa cu a haci cu ta contra ley, cual ta un di e motibonan pakico no tin un director na DIP awo, pero si un director suplente.
E investigacionnan ta andando pa mira con tin cu atende. Awo en general e mandatario a bisa, cual casualmente tabata e topico di su tesis dia el a gradua, ta con hopi como gobierno tin cu lanta expectativa cerca persona, a pesar cu ta contra ley y tin cu cumpli cu ley. Esey ta loke tin actualmente y ta tratando riba dje. Mare por sali afo na satisfaccion di tur hende, teniendo cuenta cu e preocupacionnan cu tin pa loke ta medio ambiente, ya cu esey ta preocupacion mas grandi. Tambe e preocupacionnan cu tin pa ley y e inversionista mes.
Si en caso cu bin un caso di daño y perhuicio, gobierno ta tuma esaki hopi na serio, segun Wever-Croes. Ta evalua tur cos, aunke tin di bisa cu aworaki ta demasiado prematuro cu por bin un daño y perhuicio. Tin di bay mira si berdad gobierno a actua incorectamente.
Prome minister a splica en general cu tur caminda cu por tin un riesgo di daño y perhuicio pa motibo di mal decision anterior, ta purba di evit’e, pasobra na fin di dia ta pone pueblo paga pa algo cu ta eror por ta di otro hende y esey no ta husto, el a termina bisando.
Kico ta e caso?
Ta parce cu e maneho na Departamento di Infrastructura y Planificacion (DIP) ta cambia constantemente y esey ta precisamente locual tin e proyecto multimiyonario secuestra! Despues cu e mesun director di DIP, ing. Haime Croes, a otorga permiso pa traha un tunnel pa conecta hotel na beach na 2019, laga e compania haci un inversion grandi pa esaki, awo ta bisa nan cu a cambia di opinion y nan no por haya e beach mas. Esaki mientras cu Divi Resort, bisiña di Embassy si a haya dicho permiso y awo a pidi pa ampliacion tambe.
Kico falta
Entretanto e hotel ta cla y a cuminsa ricibi huesped caba. Pero, for di e prome plan di negoshi, aproba pa Gobierno di Aruba y revisa pa tur departamento, entre otro DIP, semper a inclui e beach como parti di e proyecto. Consecuentemente, tur bende y promocion di e hotel internacionalmente, a inclui e beach. Pero, e realidad ta cu ey no tin beach. Pues no ta cuestion cu lo kita nada, sino riba propio costo di Natura Developments, lo traha un beach riba cual por pone stoel, palaba y un beach bar pa ofrece servicio di huur serbete y alimentacion na e huespednan. Pero for di lunanan caba, a bati porta na tur departamento, na tur minister y pa un of otro motibo, a opta pa unanimamente boicotia e proyecto y pone e inversion na peliger!
Gabinete Wever-Croes II ta sinta cu man crusa
No ta cuestion cu Natura Developments ta un inversionista nobo pa nos isla. Nan a desaroya diferente proyecto y esaki ta nan di tres proyecto di condominio hotelero, pero si esaki t’esun di mas grandi. Riba dje e pandemia a causa tardansa enorme, cu consecuencia cu mester a haci un fiansa extra, haciendo cu e proyecto na final a surpasa 120 miyon florin. Cualkier inversionista lo a core bay, pero e grupo aki, cu tur confiansa den Aruba, a opta pa haci nan “exposure” mas grandi y asina a demostra di ta kere den e proyecto aki. Ora nan a bati na porta di tur minister, pidiendo pa ayudo debi cu DIP tin e proyecto stanca, tur ta priminti y lubida.
A subi trapi bay hues
Mirando cu e proyecto ta cayendo atras den su huespednan debi cu no por cumpli cu nan promesa di tin un beach inclui na e hotel, Natura Development NV (e demandante), a opta pa dia 16 di maart 2023, pa pidi corte p’e tuma un medida temporal contra esaki. Corte di su banda a concede un audiencia pa un caso sumario riba dia 12 di april 2023. Ey abogadonan di e grupo cu a inverti mas di 120 miyon florin den nos economia, a haya chens pa splica e hues administrativo di con nan ta sinti cu Gabinete Wever-Croes II no ta tratando nan husto y mas bien a cambia di posicion contra e proyecto. For di otorga nan tur tipo di permiso y cooperacion pa construccion di un hotel luhoso, diripiente a cambia y ta haci tur lo posibel pa stroba nan yega na nan beach, cu e mesun Gabinete Wever-Croes I a otorga nan na aña 2019!
Kico ta e disputa
A concede e demandante un pida tereno di 18.144 meter cuadra como erfpacht cu e meta pa construi, pa por tin y pa por explota un edificio di condominio te cu 20 unidad, anexo cu e servicionan asocia y instalacion recreativo (proyecto hotelero), conforme cu un plan di desaroyo aproba pa Departamento di Obra Publico (DOW) y e permiso di planificacion cu lo a emiti.
Dia 8 di november 2018, e compania a presenta un peticion pa ocupacion di (parti di) e terenonan situa dilanti di e proyecto hotelero, pa nan por construi of amplia e beach dilanti nan hotel. A pidi permiso pa proporciona e instalacionnan di beach necesario n’e huespednan di e hotel y e construccion di un tunel subteraneo pa crusamento sigur di e huespednan di e hotel p’e beach.
Flip flop: E mesun DIP a cambia di “maneho”
Mediante di dos carta fecha dia 25 di october 2019, director di Direccion di Infrastructura y Planificacion (DIP), a notifica e compania cu nan ta di acuerdo pa amplia e beach y pa ofrece facilidadnan riba e beach aki n’e parti west/zuidwest di e percela en cuestion. A informa e compania cu solamente lo por concede un permiso pa tur actividad cu ta portatil. Baño, por ehempel, mester ta maneha door di DOW.
Dia 19 di augustus 2022, e compania a presenta un peticion pa concede un permiso di contruccion cu lo permiti nan pa amplia e beach di e luga depositando santo riba dje. Pa medio di un carta fecha dia 4 di october 2022, e compania a reitera e peticion aki. Pero gobierno (Ministerio di Infrastructura), a nenga e peticion aki, alegando cu solamente propietario di e tereno den e caso aki Land aruba por presenta un peticion.
Loke hues a taha gobierno
No obstante, e hues ta considera lo siguiente:
Den cuadro cu gobierno ta bisa cu solamente propietario di e tereno, den e caso aki Land Aruba, por pidi un permiso di construccion pa amplia e beach, cu corte ta considera cu e no por a deduci den e leynan aplicabel cu ta solamente e doño di e tereno so por aplica pa un “aanlegvergunning”. Corte ta considera tambe cu e documentonan otorga, en particular e cartanan di dia 25 di october 2019 parce ta deduci cu a otorga e compania e permisonan determina di derecho civil den nomber di Pais Aruba relaciona cu e proyecto hotelero y e beach situa dilanti di dje. Esey ta implica tambe cu mester duna e demandante e oportunidad pa pidi e permiso (aanlegvergunning) necesario na tal efecto y cu gobierno mester dicidi “inhoudelijk” riba e peticion di permiso di construccion. Gobierno lo mester evalua e peticion relaciona cu e normanan vigente, specificamente a base di articulo 23 di e ordenansa di uzo di tereno, relaciona cu articulo 5 y 15 di e Plan di Ordenacion Teritorial cu reglamento (ROPv) y no manera cu gobierno a pretende durante e audiencia, pa uza e supuesto “beach policy”.
Decision di hues den e caso sumario
Considerando cu den e corte administrativo y den e setting di un kortgeding, e tipo di decisionnan ta limita, no a keda e hues nada otro di nenga e peticion di Natura Development. A anuncia esaki dia 26 di april 2023 y no tin costo envolvi pa ningun partido den e sentencia aki.
Tocante Embassy by Hilton
Embassy by Hilton, ta un di e 18 marcanan lider den e mercado di Hilton, cu ta dedica na ofrece loke ta mas importante pa e biahero. Servicio completo, accesibel y exclusivo ta loke e marca ta ofrece na biahero di placer y pa negoshi. Embassy Suites by Hilton ta number un den su clase, cu ta ofrece two-room suites, free made-to-order breakfast, open atrium, 24-hour fitness centers y complimentary evening reception. Embassy Suites by Hilton tin mas di 260 hotel y 42 propiedad den desaroyo.
Tocante Embassy Suites by Hilton Aruba Resort
E compleho di construccion nobo di 8 piso y 300+ suites na Aruba, ta conta cu suitenan espacioso y exclusivo di Embassy Suites by Hilton, ekipa cu un sala apart, un camber priva y un minibar cu microwave, minifridge y koffiepot. E compleho ta brinda un espacio flexibel pa reunion di 6 mil pia cuadra, un spa di mas di 3000 pia cuadra, piscina den aire liber, un gym y casino, cu lo habri dentro di algun tempo mas. E hotel nobo ta ofrece un restaurant exclusivo, un bar y opcion di un grab-and-go dining pa un snack lihe. Huespednan tambe ta disfruta di servicionan exclusivo, cu ta inclui desayuno di cortesia prepara na bo gusto y recepcion anochi cu snacks y bebida.
Contrario na tur otro Embassy Suites na mundo, den caso di Aruba, a debuta un hotel na nivel “upscale”, conoci como e “all-suite” Embassy Suites by Hilton na Aruba. Doño di e edificio ta Natura Development NV, cu a cera un acuerdo di operacion cu Hilton. E edificio di 300+ suite oceanfront Embassy Suites by Hilton Aruba Resort, ta marca e di dos hotel di Hilton riba nos isla y ta reenforsa e plannan continuo di expansion di e compania den Caribe.
Ta for di aña 2016 caba a start cu preparacionnan y desde 2018 e trabounan di construccion a cuminsa, planea pa a keda cla na 2021. Pero debi na pandemia y e medidanan di distanciamento social, a stroba e proyecto y a tuma por lo menos dos aña mas pa por a keda cla.
Mayoria trahado ta local
E trahadonan, cu ta entretanto rond di 85 persona, gran mayoria local, cu hopi entusiasmo a prepara nan mes debidamente pa brinda servicio na nivel di Hilton. Nan lo crece segun e cambernan ta yena y ta anticipa pa ora e hotel ta den operacion completo, lo alcansa 300 empleado.
