Den cuadro di e scarsedad grandi cu tin internacionalmente, Aruba tambe ta experiencia retonan pa recluta y retene cierto specialistanan medico cu tin un diploma reconoci pa ley. Pa por garantisa e continuidad di cuido y a peticion di instancianan di cuido, Minister di Turismo y Salud Publico, Dangui Oduber, a publica un maneho nobo pa por garantisa calidad den e proceso pa specialistanan cu a finalisa nan specialismo den exterior na universidadnan cu ainda no ta reconoci pa ley por wordo admiti pa traha na Aruba y registra nan mes den un registro aparte.
Actualmente ya caba e specialistanan aki ta haya un excepcion temporal di un aña pa traha na Aruba na un instituto di cuido, conforme un decreto gubernamental (MB). Por renoba e excepcion te cu un maximo di 4 aña, despues di esaki e specialista medico mester cumpli cu e rekisitonan conforme cu e ley di AruBIG pa por mantene su registracion.
E maneho nobo lo haci posibel cu e grupo aki di specialista, cu ta scars, lo haya guia por medio di un trayecto pa haya nan declaracion di competencia segun e sistema di CanMEDS. Meta ta pa duna e specialistanan medico menciona e oportunidad pa pasa door di un asina yama ‘assessment’ den cooperacion cu e asociacionnan medico manera ASHA y HAVA.
E miembronan di e asociacionnan menciona lo evalua e specialista den cuadro di su funcionamento, a base di e competencianan di e sistema di CanMEDS cu entre otro Hulanda y Canada ta uza, cu ta e standard aki na Aruba tambe. E trayecto aki lo haci posibel cu e specialista medico cu completa e trayecto, cu ta tuma mas o menos 1 aña, lo por registra su mes den e registro di AruBIG.
Banda di yuda specialista medico cu a studia medicina den otro sistema traha conforme e standard di Aruba, Minister Dangui Oduber tambe a publica un maneho pa mehora e sistema di control, den anticipacion di un decreto nacional cu lo cubri esaki mas detayadamente.
Pa motibo cu lo bay haci e registro di AruBIG publico na comienso di aña 2024, e registro mester ta uno actualisa. A nota cu por ehempel algun profesional ta haci peticion pa registra sin cu nan tin un dunado di trabou of ta den servicio di un clinica. Otro ta bandona nos isla sin notifica cu nan no ta traha mas y brinda cuido na nos poblacion. Pa mehora e control aki, e maneho nobo ta specifica cu ambos caso lo ta motibo suficiente pa no procesa e peticion of pa kita e medico specialista for di e registro di AruBIG mesora. E meta di e maneho y sistema aki ta pa brinda un servicio di control y transparencia pa publico y tur instancia den sector di salud.
