Gobierno di Aruba ta celebra cu nan a logra un “surplus” den nan presupuesto di aña pasa debi na entradanan adicional mara na e impuesto nobo di BBO na frontera. Esey riba su mes a manera encurasha mas biahamento di e ministernan cu awo regularmente ta topa cu otro den VIP Room di aeropuerto entre esunnan saliendo y yegando.
Di acuerdo cu nan programa di biahe, Minister Glenbert Croes ta na New York for di dia 8 te cu 12 april pa atende reunion cu Hartree Partners y Refineria di Aruba (RdA) riba e topico di energia. Minister Ursell Arends a biaha di dia 11 te cu 15 april pa Canada pa asunto priva. Su tras mesora e mandatario ta biaha pa Boneiro entre dia 15 pa 17 di april pa participa na e “Deelname Vierlanden Overleg” riba tereno maritimo y aero na Boneiro.
Di otro banda Minister Endy Croes a biaha for di dia 12 te cu 14 di april pa atende Ceremonia Interinsular Spelen na Corsou. Minister Rocco Tjon ta afo for di dia 15 te cu 18 di april pa atende “Mental Health Conference” na Corsou. Y comosifuera poco, Minister Xiomara Maduro lo ta di biahe tambe for di dia 14 te cu 19 di april pa atende “IMF World Bank Spring Meetings” na Washington DC na Merca. E no lo regresa Aruba ora e cla eynan, sino lo sigui di Merca mes pa Hulanda for di dia 19 te cu 26 di april pa celebracion di “Arubadag” na Hulanda.
Dependiendo unda e minister ta biaha, e ta haya $450 pa cada dia pa e gasta na comemento y bebida.
