Prome minister Evelyn Wever-Croes a duna su discurso durante acto protocolario cu a tuma luga na Plaza Betico Croes cu baile y canto den cuadro di celebracion di Dia di Betico diahuebs mainta
Den presencia di Su Excelencia Gobernador di Aruba, Alfonso Boekhoudt y su distinguida esposa, presidente y miembronan di Parlamento di Aruba, coleganan minister, griffier di Parlamento di Aruba, secretaris di Ministerraad y representantenan di Hulanda na Aruba, Corsou y Sint Maarten, Cuerpo Consula, y famianan di Betico Croes.
E acto protocolar a inicia cu musica di entretenimento mientras tur invitado tabata yegando, sigui pa canto di Himno di Aruba interpreta p’e hoben Jorienne Angela. Despues a sigui un oracion pa Rev. Pastor Toti F. Fuentebella di Parokia di Santa Filomena, Paradera, unda despues mesora su tras a bini e discurso di Prome Minister di Aruba Evelyn Wever-Croes.
E programa tambe a conta cu poesia ‘Ta E Ta Betico’ skirbi pa Tio George Winterdaal, declama pa hoben J-Vyon Besselink. Na final, a clausura cu baile acompaña pa e cancion titula Betico di Ronny Kock, presenta p’e grupo di baile Mini y Pre Teen Chaz Dancer bao direccion di Chastity Kock-Hodge. Concluyendo e mainta protocolar cu acto di ofrenda floral, algun canto y mas baile clausurando e ceremonia protocolar den forma ameno.
‘NO TIN SACRIFICIO SIN GLORIA’
Un dicho popular di Betico, ‘No tin lucha sin sacrificio, y no tin sacrificio sin gloria.’ Si Betico lo tabata na bida awe, e lo a cumpli 86 aña di edad. Tur esaki a keda subraya den discurso di minister-president, kende a toca tambe riba tur e sacrificio cu Betico a haci pa nos pueblo hunto cu esunnan cu a lucha banda di dje cu awe tambe nos ta recorda. “Nos ta corda e manifestacionnan, e protestanan hunto cu su pueblo, su encarcelamento inhusto. E tiramento di 24 April, 1983, y accionnan di augustus scur na 1977. Pero ta danki n’e accionnan aki, cu porfin mundo henter na 1981 a duna atencion na e lucha di nos pueblo, reconociendo e derecho di autodeterminacion,” minister-president a expresa.
Chastity Kock-Hodge, director di Chaz Modeling & Talent School a combersa cu nos tambe un rato riba e preparacionnan cu ta haci cu e muchanan di baile pa loke ta e acto protocolar aki.
