Acogida den charla informativo riba abuso sexual na MFA Savaneta tabata grandi

Diamars a tuma luga un anochi informativo tocante abuso sexual, organisa pa APG (Arubaanse Padvinsters Gilde), Fundacion Lisette Gomes y Gobierno di Aruba, na MFA Savaneta, cual tin cu remarca tabata completamente yen.

Durante e charla aki por a nota presencia di tanto Minister di Enseñansa, Rudy Lampe, como tambe presidente di Parlamento Ady Thijsen.

Grace Maduro, presidente di APG, a splica cu e charla aki ta un di e seisnan cu ta bay tin den e diferente bario, den tur e MFAnan y na San Nicolas den Teresita Center y na Playa na Biblioteca, den cual ta bay duna mayornan informacion di con por traha y haci nos muchanan mas fuerte pa nan siña bisa no. E mundo eyfo no ta facil, , el a bisa, pero e metodo aki ta uno hopi bon hinca den otro na Papiamento di Aruba, cu canticanan, cu por wordo duna na scolnan. Por ehempel den gruponan di APG, na September ta bay train tur lider pa ehecuta e programa aki, pasobra e ta alinea cu loke cu APG como miembro di e grupo mundial di padvinderij “Free Being Me” ta para p’e.

Maduro mes tin un empuhe tras di e proyecto aki pasobra e ta cansa di tende tocante di abuso sexual. E ta compronde cu e ta algo di hopi aña. Pero un caminda mester pone e paro. Un caminda mester bisa for di awo p’adilanti, ta bay handle e asunto aki di un otro manera.
Maduro ta bisa di ta compronde tur e discusionnan academico, y e evluacionnan cu ta wordo haci di esaki. Pero cu esey nos no ta preveni pa muchanan no wordo abusa. Esaki mester ta manera na Hulanda, manera na Corsou y Maduro ta ripiti, na tur scol catolico na Corsou, e programa aki similar, pasobra nan Papiamento ta otro cu di nos, tin un fundacion apart ya pa añanan caba cu ta educa e maestronan di scol y yuda pa e muchanan bira mas fuerte y por para pa nan mes. APG a cuminsa cu informacion pa mayornan. Pero cu tanto cos ta pasando den comunidad, a dicidi pa acerca MFA wak kico por a haci.

E acogida tabata hopi grandi. Nan tin bendicion di Gobierno y Maduro mes, den su buskeda di kico tin na Aruba, ken ta haci kico, a bin topa cu e metodo aki. El a pasa door di e metodonan cu tin di SKOA, cual ta un metodo di educacion sexual, cu ta full otro pa  haci e mucha fuerte contra di abuso sexual na un edad hoben.
E metodo aki ta uno pa klas 3, 4, 5 y 6. APG mes tin un metodo cu ta yama Free Being Me, cu ta uza den nan grupo di padvinderij, cu esey ta pa muchanan di 5, 6 aña. For di eynan caba ta cuminsa pa nan cuida nan curpa, con nan mester anda cu nan mes. Con nan ta cuida nan parti intimonan, con nan ta baña nan curpa y cu ningun hende no mag di mishi cu nan.

Maduro ta reta tur hende cu ta haci dificil y cu ta pensa cu esaki no ta na su luga, pa bin cu un metodo cu por baha e cantidad di abuso sexual den nos comunidad cu 50%. Maduro lo ta feliz y contento si abo tin e metodo y e lo sigui’e. No por keda discuti mas. Cada mucha abusa ta un mucha di mas.