Frakshon di MAN ta kondena e abuso ku a tuma lugá ayera mèrdia den Oranjestraat kaminda den un akto inaseptabel i repudiabel kriminalnan sin ningun klase di rèspèt pa hende grandi a atraká i purba violá un señora ansiano i bai laga e señora aki tur traumatisa atras.
Otro siman dia 15 di yüni mundu ta para ketu riba agreshon kontra hende grandi (elderly). Ta asina ku aki na Kòrsou, demasiado biaha den seno familiar i pafó di esaki, ansianonan ta wòrdu agredí verbalmente i físikamente.
Mirando e último desaroyonan aki di aktonan kriminal ta importante pa nos kuida nos grandinan i denunsia tur tipo di agreshon na outoridatnan konserní. E tendensia alarmante aki di agreshon kontra nos grandinan ta trese e nesesidat pa komo parlamentario di Frakshon di partido MAN nos para ketu na e asuntu aki. Nos ta pidi pa oumentu di kastigu den nos kódigo Penal pa esnan ku agredí ansianonan den e pais aki i asina por medio di lei duna nan e protekshon ku nan meresé na e edat respetá ku nan a alkansá.
