Ya ta mas cu 10 aña caba cu Stichting Parkietenbos ta luchando pa cera y sanea e dump di Parkietenbos. E solucionnan cu a ser busca pa un motibo of otro no a resulta y despues na un forma iresponsabel a laga e dump di Parkietenbos crece y bira un sero halto cu awe constantemente ta causa molester y problema di salud pa e habitantenan di e barionan den cercania. Esaki a bini dilanti den un conferencia di prensa
E solucion cu a ser busca pa dera desperdicio procesa, cu yama envirobales, na Seri Teishi tampoco a resulta. E habitantenan di e barionan concerni tin mas molester di holo malo y gasnan toxico cu nunca.
“Nos tin hopi caso di hende cu ta bira malo constantemente; di muchanan te cu hende grandi. Alergia, astma, dolor di cabes continuo, dolor di garganta, griep y un cantidad di malestar mas cu nos habitantenan di e barionan a soporta sperando riba un solucion. Lamentablemente e solucion no a bin, y awor e barionan tin dos biaha mas molester; di Ser’i Teishi y di e Dump di Parkietenbos, esaki a bira insoportabel. Awor e fundacion di e barionan ta organisando un accion di firma pa forsa Gobierno soluciona e problemanan grave cu ta afectando e barionan.”
Diadomingo 26 di Januari proximo Stichting Parkietenbos ta invita e habitantenan di e barionan: Kas Paloma, Mahuma, Sero Biento, Balashi, Wayaca, Primavera, Buena Vista, Simeon Antonio, Bucutiweg, Dakota y Tarabana pa un accion di firma pa pone un paro na e actividadnan na Seri Teishi y pa sanea Dump di Parkietenbos. E ora ta di 9 or di mainta pa 2 or di atardi na Centro Deportivo Simeon Antonio, caya Universal Aviation/Bucutiweg.
Riba internet tambe lo cuminsa un accion pa colecciona apoyo di henter nos comunidad pa salba e barionan y pueblo di Aruba di mas problema ambiental. Maneho di desperdicio mester cuminsa wordo haci na un manera responsabel, pues aki no ta trata di problema di solamente un bario sino di henter un comunidad.
