“Homeschooling”, esey ta e nomber cu Minister dr. Armando “Rudy” Lampe a uza awe pa splica kico lo bira futuro di e hoben di fam K. cu recientemente a manda un menasa cu lo tira alumnonan di Colegio Arubano mata. Despues di algun siman di e menasa, Colegio Arubano a entrega keho na Polis y a detene e mucha di 11 pa 12 aña di edad, cu ta atendiendo Mon Plaisir College, cu entretanto a kit’e for di scol. Pa awor e lo por sigui haya les, pero na cas.
Minister di Enseñansa no ta considera e medida tuma mucho pisa of inadecua. Tampoco por bisa cu Gobierno no ta cumpliendo cu “leerplicht” pa e alumno aki. Simplemente e lo tin acceso na loke ta yama na e idioma Hulandes “Onderwijs op een ander locatie”, un fenomeno cu na Hulanda ta birando dia pa dia mas popular pa diferente motibo y circunstancia.
“Leerplicht no kiermen schoolplicht”, segun Minister Dr. Rudy Lampe, cu tambe ta bini for di e sector di enseñansa, pues conoce e retonan aki na scol. El a aclaria cu e mucha tin derecho riba educacion, pero na Aruba ta traduci esey cu e mucha mester asisti na un scol. “Pero e por asisti na cas, via internet of for di un otro sitio. Asina ta cumpli cu leerplicht, pero no sinta den banki di scol”, segun e titular di enseñansa a bisa awe mainta durante un conferencia di prensa na Bestuurskantoor.
Pa loke ta e caso specifico aki, a enfatisa cu e mucha encuestion mester di yudansa. E miho solucion ta Homeschooling, segun e mandatario. Es mas, si no ta na cas, e por bishita Biblioteca Nacional den George Madurostraat cu e siman aki ainda a start cu un proyecto di “Online Schooling”. Tur esaki ta pa duna mas mucha y hobennan acceso na educacion, solamente cu e ta di un otro forma y no necesariamente ta sinta den banki di scol.
Segun Minister Lampe, un di e motibonan cu muchanan ta stop di bay scol y ta busca alternativa pa sigui educa nan mes, ta precisamente e fenomeno creciendo mundialmente di “Bullying”. Ta cu e realidad aki den mente, como mandatario cu ta haya hopi peticion di mayornan, a dicidi di habri e posibilidad pa dunamento di les na cas mes, online of na Biblioteca Nacional. Contal cu e mucha tin acceso na educacion, esey p’e ta mas importante.
