Cu maximo urgencia a presenta riba Caya Ernesto Petronia pa atende cu un accidente basta fuerte entre dos vehiculo. Na yegada a topa un dos persona seriamente herida den un Land Cruiser Prado color blanco (TX-219) mientras e chauffeur di e Chevrolet Equinox color cora (A-20014) tabata keha di dolor na curpa pero a sali riba su mes un pianan for di e vehiculo.
Esaki a tuma luga aproximadamente 2:00 pm ora cu patruya a presenta y cuminsa cera caminda di ambos banda. E accidente a tuma luga net dilanti Topcar net na e drempel cu tin eybanda. E impacto tabata kasi frontal y ademas di dos persona seriamente herida, e daño material ta considerabel. Na prome instante a cuminsa tuma tur dato for di e chauffeurnan pero na dado momento a cuminsa sinti cu e storianan no tabata cuadra mucho.
Polis di trafico a presenta tambe na e sitio di accidente y no a tarda mucho cu a pidi un ‘alco-sensor’ na e accidente pa asina nan por haci un test cu e chuaffeur di e auto cora. Na sitio por a scucha e persona aki ta indica na e polisnan na sitio cu e ta un funcionario di Ministerio Publico y no ta haya cu ta na su luga pa e miembronan di prensa ta sacando su potret.
Tambe el a informa cu e ta recien yega di Hulanda y cu e sistema na Hulanda ta diferente. Cu ta proteha identidad di un funcionario pa asina no daña su imagen den prensa.
No a tarda mucho cu a pidi e transporte di polis pasobra e resultado di e test no a sali na su fabor. Polis a detene na sitio y for di eynan a bay cu ne warda di polis Playa caminda e prodecura di su detencion lo continua.
Di otro banda ambulance a presenta y transporta ambos victima pa hospital caminda nan lo ricibi atencion medico. Nan a resulta basta herida mirando cu airbag no a sali of e vehiculo no tin esaki. Pa locual ta trata e funcionario di Ministerio Publico, su version di e sucedido tabata, cu un otro vehiculo lo a brake abruptamente su dilanti cu a pone cu etambe a brake di golpi y a bay dal semi-frontal den e TX blanco biniendo di direccion contrario.
