“Esaki tabata e decision di mas importante y esun cu a sali na su fabor,” abogado mr. Desiree Croes a bisa di e veredicto cu tabatin dialuna mainta den caso di e funcionario policial Clarisca Velasquez. Un caso cu a cuminsa na april 2020, ora cu a suspend’e bou capa di violacion di Shelter in Place te cu a yega na e decision di bah’e di rango y baha su salario pa loke nan ta considera incumplimento di su deber. Corte a conclui cu no tin base pa tuma medida disciplinario pa tempo indefini contra e polis.
Tabatin diferente caso pero tur ta relaciona cu entre otro e prohibicion pa drenta su trabou of edificio di KPA. Contra cada medida a bay Corte pa evita e caso final aki, pasobra tabata sigur cu e decision contra dje no tabatin base. Corte a bisa cu door di COVID cos ta bay slow y a tuma tempo pa finalisa cu e investigacion prome cu a yega na e parti di tuma decision.
Velasquez y su team di polis a huur un villa pa keda dos dia y Polis a drenta eyden acusando nan di a viola reglanan di Shelter in Place. Despues cu nan a meld ziek, a acusa Clarisca Velasquez di a palabra esaki cu su team, mientras cu e no tabata sa cu nan ta bay meld ziek. A acus’e tambe di papia malo publicamente di su superiornan, entrega keho falso, falta respet na su superior, papia malo cu un aspirant agent, etc.