Entre e informacionnan cu a bin dilanti durante e conferencia di prensa di dialuna mainta for di Ministerio di Energia, ta resalta e echo cu, den aproximadamente dos siman, ta bay presenta na Conseho di Minister un plan pa e desaroyo di zona di refineria. Segun Minister di Energia, Glenbert Croes, e recomendacionnan ta busca pa genera actividad energetico y turistico pa beneficia Aruba completo economicamente.
Entre e condicionnan riba cual ta basa pa delinea e plan, ta cu cualkier proyecto energetico, mester opera uzando gas natural, mescos cu Eagle LNG. “Y asina ta bay tin varios den un vision total, pasobra e realidad ta cu e zona ey, cu tabata destina pa refineria, ta un zona potencial cu tin parti cu por uza pa proyecto di energia y tin parti cu por uza pa desaroya turismo”, asina Minister Croes a declara. Den e ultimo aki, el a specifica cu tin partinan cu ta conecta cu downtown San Nicolas na dos diferente punto.
“Ki industria energetico cu bo haya, no lo ta un forno bieu; lo ta algo moderno operando a base di gas, pa cual tambe lo contribui na GDP”, asina e titular di energia a menciona refiriendo na genera trabou pa contratista, crea cupo di trabou y entrada pa gobierno. En todo caso, “e bida di e industria energetico pa e zona ey, ta bay ta cu tecnologia moderno”, el a afirma. “Refineria manera antes no lo existi mas”.
Pa e relato completo, lesa TREMPAN
