Awe e minister demisionario encarga cu maneho di enseñansa, ciencia y desaroyo sostenibel, esta dr. Armando R. Lampe a topa cu su sucesor, esta futuro Minister di Enseñansa y Deporte, esta Jan Hendrik Croes, miho conoci como Endy. Si tur cos ta bon, sea diabierna of dialuna e ministernan lo huramenta dilanti Gobernador interino, pa por cuminsa eherce nan funcion den forma oficial. Pero manera ta custumber, e minister saliente ta entrega un documento di traspaso na su sucesor.
Den e documento aki tin tur asunto coriente, plannan cu a laga cla atras y vision di e minister saliente. Ta sali for di e punto di bista cu gobernacion ta continuacion, pues cu e gobierno nobo lo continua cu e asuntonan cu a keda pendiente atras. Door di entrega e documento aki, gobierno ta evita cu proyectonan ta keda pega djis pa motibo di cambio di gobernacion.
No por keda sin señala cu e Minister di Enseñansa saliente no semper tabatin un bon relacion cu e veld di enseñansa y pio cu e sindicatonan cu ta representa esunnan trahando den e ramo. E comunicacion entre gobierno y enseñansa no semper tabata optimal. Es mas, na varios ocasion tabatin hasta manifestacion y accionnan di protesta, sin lubida cu a manda carta pa minister-president direct pasobra partidonan no por a keda cla cu Minister di Enseñansa.
Endy Croes riba su mes ta asumi e funcion cu algun reto pisa pa resolve. Separa cu e tambe, siendo parlamentario a acusa e sindicato di polis y esun di maestronan di tabata shouro, pasobra nan a bay protesta na Bestuurskantoor. Algun docente a epxresa ribe red social cu nan ta spera un disculpa di e minister nobo, prome cu cuminsa deliberacion cu ne.
