Awe dia 16 di september den un reunion publico a trata y aproba e credencialnan di 8 candidato pa parlamentario. Ta parce cu awor Aruba tin 29 Parlamentario si esunnan cu lo bira minister ainda no a nenga nan posicion como parlamentario. Ta pa urgente trata e credencialnan di esunnan cu lo kier bira minister pa cumpli cu ley. Sinembargo no a yama e reunion ey ainda.
Dia 14 di september, riba e di dos diamars di luna, manera indica den nos Constitucion, tabata apertura di aña Parlamentario nobo 2021-2022. Gobernador di Aruba a duna acto di presencia na Parlamento y a duna su discurso den cual el a presenta e maneho di gobierno pa pa e proximo aña. Prome cu dia 1 di september gobierno lo mester a entrega e presupuesto di pais Aruba pa e aña benidero. Ta un lastima, segun Wyatt-Ras, cu gobierno no a cumpli cu locual Constitucion ta indica, ni e aña aki ni durante nan gobernacion, desde aña 2017. E eleccion dialuna, dia 13 di september, di e presidente y vice-presidente di Parlamento tampoco no a bay manera cu mester a bay.
Di antemano tabata conoci ken lo bira e presidente y vice-presidente, pasobra gobierno a anuncia esaki, locual ta muestra di un stempelparlement. P’esey mes fraccion di AVP hunto cu otro fracion den oposicion a vota ‘en blanco’. Ta obvio cu den parlamento aki gobierno lo dicidi y manda riba e fraccionnan cu ta sosten’e. Repasando e trabounan di parlamento den e aña parlamentario 2020-2021 por conclui cu e ministernan di Gabinete Wever-Croes no a contesta pregunta di e parlamentarionan lo suficiente. Di e cantidad di 1238 pregunta cu e miembronan di parlamento a haci solamente a contesta 459. Esaki ta 37% so.
Wyatt-Ras mes a haci 141 pregunta na diferente minister y solamente a haya contesta pa 65, locual ta 46 % so. Tin 2 minister cu no a contesta ningun pregunta por escrito, esta Maduro y Romero.
Aki por conclui cu tin falta di transparencia y respet pa parlamento, locual ta trece democracia na peliger. Durante e aña cu a pasa por a nota alabes cu e reunionnan publico pidi no tabata wordo yama. A trata e problemanan importante den Bijeenkomst y no den Reunion Publico. E diferencia ta cu den un Bijeenkomst por haci pregunta informativo solamente den un tempo corto, mientras cu den Reunion Publico cada parlamentario por tin 20 minuut den prome tanda y 10 minuut den segunda tanda pa haci pregunta of cuestiona gobierno y tambe por presenta mocion y den caso ta trata un ley por presenta amienda.
Wyatt-Ras y su fraccion ta condena cu gobierno no ta tuma parlamento na serio y cu e presidente di parlamento tabata complaciente cu gobierno y no a obliga gobierno pa contesta pregunta y preocupacion di e parlamentarionan y nos pueblo. Un punto di atencion ta keda e hecho cu gobierno mester duna cuenta na parlamento di loke e ta haci. Mester responsabilisa. Den caso esaki no sosode, nos democracia ta sigui decae. E ora nos no por papia mas di e poder di nos pueblo. Wyatt-Ras ta spera cu por cumpli cu e promesanan di e politiconan cu lo tuma rienda di nos pais. Ta urgente cu tin respet pa nos pueblo y pa parlamento.
