Ayera mainta Prome Minister mr. Evelyn Wever-Croes a ricibi bishita di Astrid Britten, director di Bibliotheek y Elvis Tromp cu ta pintor y diseñado grafico conoci na Aruba. E ta e ilustrado di e buki cu ta participa den e Kinderboek Festival 2020, pa cual motibo
el a bishita Prome Minister pa regal’e e buki.
E buki ta hiba como titulo ‘Ora Ubao, Schelpeneiland’. Autornan di e buki ta e Arubianonan Liliana Erasmus y Robert Reeberg y
dos Hulandes Lizzy van Pelt y Jeroen Hoogerwerf.
E di 28 edicion di e Kinderboek festival 2020, cu ta hiba e tema, Tempo di mi tempo, ta tuma luga e aña aki na un manera virtual diabierna 30 di October atardi y por wak esaki na e canal di television 49.
Prome Minister a keda hopi impresiona cu e buki y e ilustracionnan colorido y bunita di e pintor Elvis Tromp y ta recomenda e buki na tur mayor. Lesamento di buki ta hopi importante pa desaroyo di nos muchanan.
“Mi ta encurasha tur mayor y cuidado di nos muchanan, pa cuminsa lesa cu nan di trempan y conta nan storia. Esaki ta e miho regalo cu nos por duna nos muchanan. Lesamento ta habri un mundo grandi pa nan y por ta un fuente di inspiracion y aventura pa nan”, Prome Minister Evelyn Wever-Croes a expresa.
