“Mi no a core duro, mi no a core iresponsabel y mi no a causa e accidente fatal,” ta loke cu e homber Ricardo Gale di 42 aña a bisa diahuebs mainta den Corte. Ministerio Publico a acusa e homber aki, naci na Jamaica pero biba na Aruba pa hopi aña caba, di lo siguiente: Ta acus’e di a causa un accidente di trafico riba 11 di november 2020, door cu e como chauffeur di un minivan bayendo riba caminda entre rotonde di airport y rotonde Las Americas, a stuur di tal manera cu a causa un accidente di cual un persona a fayece. Ta acus’e di a core cu un velocidad di mas o menos 95 km/ora, a pusta cu auto, a core masha cerca di otro auto y a stroba e auto di e victima di pas’e, a consecuencia di cual e victima a perde control riba stuur y a bay dal den un mata.
Ta acus’e di siendo chauffeur cu a causa e accidente riba 11 di november 2020, a bandona e sitio, mientras e tabata sa cu tabata trata di un accidente cu daño grave. Y na di tres luga, ta acus’e di a stuur auto sin rijbewijs riba 11 di november 2020.
El a admiti su culpabilidad riba di dos y di tres acusacion. Pero el a bisa cu el a bay pasobra el a spanta y ademas e no tabatin di haber y envolvi cu e accidente.
Segun el a splica, e tabata bayendo rotonde Las Americas direccion di aeropuerto, “mi no tabata pusta ni core duro duro pasobra tabatin un auto mi dilanti”. E tin dos diferente declaracion duna, uno na Polis y uno den Corte. Na Polis el a bisa cu el a mira e auto di leu biniendo duro y den Corte el a bisa cu el a scucha diripiente e zonido cu un auto ta haci ora cu e brake. Y despues a mira e auto zwaai y bay na banda robes. E ta nenga loke el a bisa na Polis cu e tabata pura pa yega su cas, pa cual e no tabata core duro. Y e no tabata sa mes cu tabatin un morto den e accidente.
Dies dia despues di e accidente fatal a detene na momento cu el a bay mecanico pa drecha e auto.
Tin declaracion di diferente testigo. E chauffeur dilanti dje ta bisa cu e mes tabata core no mas cu 60 KM pa ora. E pasahero a bisa cu el a mira tur cos pasa y e auto tabata trata di pasa nan y tambe esun su tras. Pero e acusado ta nenga.
“Niun momento tabata mi intencion pa pasa e auto mi dilanti.” Otro testigo patras tambe ta bisa cu na momento cu e Suzuki Baleno a hala pa pasa e Mini Van, e chauffeur di e vehiculo aki (esta e mini van) tambe a bay pasa e auto su dilanti. E chauffeur di e Baleno a brake, perde control, bay banda robes y despues a bay dal den e mata di kwihi.
Tin declaracion di un persona cu tabata sali for di banda di ex-Talk of The Town y a bisa cu el a mira e dos vehiculonan ta core duro, manera cu nan tabata pusta cu otro. Esaki e abogado mr. Emerencia a bisa cu ta totalmente falso. “E vehiculonan tabata yegando final di un caminda na rotonde Las Americas y mester a baha velocidad pa duna e otro trafico preferencia.”
Representante di Ministerio Publico si a uza declaracion di testigonan pa haci peticion pa declara e acusado culpabel di e acusacionnan. El a enfatisa cu den e caso aki no tabata intencion di e acusado pa mata un hende y p’esey e acusacion tambe ta papia di culpa. Esta cu el a actua di tal forma, no “roekeloos” pero si di un forma iresponsabel cu por bisa cu e accidente ta pa su culpa.
A menciona tambe declaracion di un persona riba brommer, kende a bisa cu el a mira ambos auto ta core cu velocidad halto. El a bisa cu e escenario cu e tin su dilanti ta cu e homber A. De Cuba den e Baleno a bay pasa e mini van cu tambe a hala pa bay pasa e auto su dilanti. Esaki a causa cu esun di e Baleno a perde control y a bay dal den e mata di kwihi. E impacto a saca e chauffeur for di e vehiculo.
Despues di e accidente, e acusado aki no a para pa mira kico por a pasa y si e persona mester di ayudo. El a simplemente bay su cas y dies dia despues polis a detene.
“Mi conclusion ta cu el a stuur di un forma sin cuidao, duro y cerca di un otro vehiculo. Ademas e no tabatin rijbewijs y a bay for di e sitio despues di e accidente.” Pues, e fiscal ta bisa, por papia di culpa pero no intencionalmente.
A tene cuenta cu e accidente aki a sosode mas cu dos aña pasa. Sinembargo mirando e seriedad di esaki no por keda sin pidi un castigo di prizon. P’esey a pidi 6 luna, tambe a pidi pa kita rijbewijs di e chauffeur pa cinco aña largo.
E viuda di e chauffeur defunto a haci un demanda di 35 mil florin entre diferente tipo di compensacion, pero pa fiscal ta kere cu e suma ta un poco mas cu 8 mil florin so por otorga. Pa e resto e por cuminsa un caso civil.
Dia 8 di februari proximo lo tin sentencia.
