Partido MEP ta lamenta cu un ex-candidato ta haye involucra den un investigacion cu husticia, sinembargo tin tur confiansa den husticia di Aruba. Den un relato di e partido politico cu a logra mas voto den e ultimo eleccion parlamentario di Aruba, cu Chris Romero no a participa den e ultimo eleccion y no ta candidato di partido MEP desde mei 2021.
Mester laga husticia cana su caminda y na final di e investigacion, esunnan responsabel mester wordo responsabilisa. Partido MEP ta para pa integridad y a demostra esaki a traves di varios ley y maneho implementa durante Gabinete Wever-Croes 1 y 2.
Nos lider, Evelyn Wever-Croes semper a vocifera cu esunnan cu haci cualkier cos cu no ta integro, mester carga nan responsabilidad pa esaki. Partido MEP no ta brasa ni defende corupcion di ningun hende, sin importa laso familiar, amistoso of politico. Esaki a keda demostra tambe tempo cu un miembro di partido (mr. Gerick Croes) a comete iregularidad financiero den partido durante su funcion como tesorero di partido. MEP no ta pone man riba cabes di politico corupto manera Partido AVP ta haci y laga nan den poder of keda sostene nan.
Partido MEP ta sigui combati corupcion, ni con dificil e ta. Ta tuma henter un comunidad pa combati esaki. Ora bo ta ripara kiebro di integridad of algo ta cana robes, denuncia esaki. Hunto so nos ta combati e malo aki y haci di Aruba un pais mas integro.
Nota di redaccion: Mientras cu a laga ex-Minister Chris Romero cay den e relato aki, no a haci ningun mencion di Guillfred Besaril ni Eddie Paris cu si tabata riba lista den ultimo eleccion y a fungi como Minister Plenipotenciario (suplente) na Hulanda. Tampoco no ta lesa nada di ex-Minister Eddie Briesen, consehero principal di e partido y di Gabinete Wever-Croes II cu tambe ta bou di investigacion pa corupcion. Te ainda Gabinete Wever-Croes II no a anuncia cu si a suspende e contract di Eddie Briesen ni tampoco si a bah’e di e funcion di presidente di Refineria di Aruba (RdA).
