Awe t’e dia: Un flor p’e partner den coalicion

No ta un secreto cu siman pasa y e dianan su dilanti, e relacion entre e partnernan cu ta forma Gabinete Wever-Croes II ta bou di basta presion y por considera di ta den un “impasse”. Un ke otro tin di haber cu e decision cu Gobierno di Aruba mester tuma riba e sentencia di Corte Comun di Caribe Hulandes relaciona cu casamento di parehanan di mesun sexo. Raiz ta boga pa acepta e sentencia y lag’e bira ley. MEP di otro banda kier apela e sentencia den Corte di Casacion na Hulanda y asina sigui cu e lucha pa evita cu parehanan di mesun sexo por casa na Aruba. No ta tur minister ni tur parlamentario den MEP ta riba e mesun liña y como tal e decision aki a percura pa division y hasta poco polarisacion entre e politiconan di tur partido!

Pero, pa por baha e tensionnan y pa mustra un cara completamente diferente pa pafo, awe Minister Ursell Arends a entrega na su partner di coalicion, Prome Minister mr. Evelyn Wever-Croes un bunita flor riba dia di “Amor y Amistad”. Riba e carchi e mandatario a skirbi “Feliz dia di Amor y Amistad….Minister Ursell Arends”. Cu esey, banda di e sonrisa grandi riba ambos cara di e dos lidernan politico cu ta sostene e coalicion na mando, ta manda un mensahe na comunidad cu tur cos ta OK.

De facto, Ursell Arends tin gobernacion den su mannan awo. Pa dos motibo; El a keha MEP na husticia pa corupcion di cual tin dos ex-Minister awor bou di investigacion. Cu esey, Raiz a kibra tur e forsa di MEP pa papia di “integridad” of pa culpa cualkier otro gobierno of partido di no ta integro. Cu su figuranan manera Guillfred Besaril, Eddie Paris, Chris Romero y Eddie Briesen bou di investigacion, ta muestra cu no por confia nan cu poder ni cu placa.

E di dos motibo ta cu Arends tin e decision den man awo relaciona cu bay casacion of no, pa cu e sentencia riba matrimonio di parehanan di mesun sexo. Den caso cu MEP para duro cu e ta bay casacion, ta core e risico cu Raiz ta kita sosten di e coalicion, cu tur consecuencia cu esey por tin pa nan existencia. Tampoco ta nifica cu gobierno a cay y lo bay eleccion, pasobra por cambia e constelacion y join oposicion y lo tin un coalicion di 12 asiento atrobe. E siguiente dianan lo ta interesante, pasobra partidonan tur ta midi riba cualkier movecion pa por capitalisa!

Tocante Partido MEP:

Gilberto F. “Betico” Croes a funda Movimiento Electoral di Pueblo (M.E.P) dia 9 di februari 1971. Lidernan desde su fundacion tabata Gilberto F. “Betico” Croes, Nelson Oduber y Evelyna Wever-Croes. A participa 17 biaha den eleccion. Record maximo di voto: 25,172 (2001) y record minimo di voto: 8095 (1973). Den e ultimo eleccion na juni 2021, partido MEP a logra 20.700, bon pa 9 asiento den Parlamento. Nan ideologia ta Social democrata.

Tocante Partido RAIZ:

Tai Foo Lee & Ursell Arends a funda Partido RAIZ dia 9 di Juni 2017. Lider desde fundacion ta Ursell Arends y a participa dos biaha den eleccion, na september 2017 y juni 2021. Record maximo di voto: 5481 (2021) y record minimo di voto: 2107 na 2017. Ideologia di Partido RAIZ ta social democrata, progresivo y liberal.

Tocante Gabinete Wever-Croes II:

Eleccion yama adelanta dia 25 di juni 2021 a produci un resultado di cual e panorama politico a bira MEP cu 9 asiento, AVP cu 7 asiento, Raiz cu 2 asiento, MAS cu 2 asiento y Accion21 cu 1 asiento, pa hunto forma e 21 asientonan den nos Parlamento. Dia 20 di september 2021 e ocho ministernan di e Gabinete Wever-Croes II a huramenta of haci promesa dilanti di Gobernador Interino di Aruba, Yvonne Laclé-Dirksz. E gabinete Arubiano nobo ta un coalicion di MEP y RAIZ y ta conta cu ocho minister: seis di MEP y dos di RAIZ. Gabinete Wever-Croes II ta forma pa Evelyna C. Wever-Croes (MEP) como Minister di Asunto General, Innovacion, Organisacion gubernamental, Infrastructura y Planificacion Teritorial. Alabes e ta minister-president. Geoffrey B. Wever (Raiz) a bira Minister di Asunto Economico, Comunicacion y Desaroyo Sostenibel. Ursell M. Arends (Raiz) a haya e cartera di Minister di Integridad, Naturalesa, Transporte y Cuido di Grandinan. Alabes e ta e vice Prome Minister. Xiomara Maduro (MEP) a huramenta como Minister di Finansa y Cultura. Rocco Tjon (MEP) a bira Minister di Husticia y Asuntonan Social. Glenbert Croes (MEP) a huramenta como Minister di Labor, Integracion y Energia.

Danguillaume Oduber (MEP) a bira Minister di Salud Publico y Turismo. Endy Croes (MEP) a haya e titulo di Minister di Enseñansa y Deporte. Na un prome instante a mantene Guilfred Besaril den e funcion di Minister Plenipotenciario di Aruba na Hulanda, pero na caminda el a tuma su retiro y a nombra Juan “Ady” Thijsen na su luga. Debi na un investigacion interno, a kita Besaril for di trabou y a keh’e penalmente.