Ayera nochi a tuma luga instalacion di e directiva nobo di Kiwanis Club of Young Professionals Aruba na Patio 15. Ey a instala Mauritz Ras como presidente di e directiva pa 2020/21. Durante e anochi special tabatin instalacion di e directiva, cu lo tin un aña cu ta premira di ta uno super activo, loke nan ta desea tambe. Tambe e parti di donacion cu nan kier haci den un escala menos grandi pa por aproba tur peticion cu ta haya durante di aña.
Ras ta agrega cu pa e aña anterior, tabata un aña no comun. Un aña cu no a logra realisa tur proyecto. E recaudacionnan di fondo cu tabata riba plan, no a realisa, haciendo un impacto riba e parti financiero.
P’esey pa e aña aki lo bay den un escala mas chikito di donacion pa asina toch por cumpli cu tur e demandanan cu ta haya durante di aña.
A duna un man na varios instancia
Kiwanis a duna man na varios instancia durante e pandemia aki. Segun Ras a haya diferente peticion a esaki. Como Kiwanis ta enfoca riba e parti di mucha. Aki tambe a haya diferente peticion, en particular pa e aña escolar nobo, demanda pa haci donacion tabata basta. Naturalmente a cumpli cu esaki te asina leu cu tabata posibel pa e club.
Tin e proyecto tambe hunto tur e otro Kiwanis Clubnan di Aruba, cual ta e proyecto di Back to School cu a tuma parti na dje durante e aña Kiwanistico anterior y pa e proximo aña Kiwanistico, esaki lo ta e caso un biaha mas.
Interes pa por join
Ras a splica cu nan tin un pagina riba Facebook cu ta Kiwanis Club of Young Professionals Aruba, y por manda un mensahe riba esaki indicando cu tin interes pa bira miembro. E mester ta cu bo kier duna bek na comunidad.
E ta bay rekeri un parti di tempo liber, pero no tin nada mas dushi cu duna bek na comunidad, principalmente na e muchanan di Aruba. Cu esaki tambe ta yuda e parti curicular. Tambe e bida profesional y personal tambe, Ras a splica.
E directiva
Tin diferente persona di e directiva anterior, cu a bolbe esun nobo. Como vice presidente y secretaria tin Stephanie Daal. Como tesorero y presidente electo tin Jolitza Limonier. Y asina ta sigui pa e demas directornan.
Un celebracion diferente
Awor aki nos ta den un situacion diferente. E directiva di Kiwanis Young Professional normalmente ta haci su celebracionnan diferente. Na mei 2021 nan lo ta celebrando 10 aña. Sigur lo ta un aña special pa e organisacion. Ras ta gradici un y tur pa nan aporte pa haci e evento aki posibel.
