Seis trahado cu a bay Corte pa caba cu nan relacion laboral cu Toys 4 Us a gana nan caso. A gana den e sentido cu a aproba pa finalisa e relacion di trabou y pa haya un bon compensacion!
E trahadonan aki a dicidi cu nan por perde tur cos despues di tanto aña di servicio. A manda e grupo di seis aki cas, pero a sigui traha y awo tabatin tres luna sin ricibi pago y a dicidi cu ta basta cu e situacion.
Tabata aña pasa den luna di september cu trahadonan a ricibi un carta unda cu ta bisa nan cu ta bay finalisa e acuerdo laboral entrante prome di october 2022, pa motibo cu e operacion no a bay bon despues di pandemia. Lo bay muda pa un otro punto y lo huur e edificio. Lo paga trahadonan nan añanan di servicio. Pero e oferta cu a haci ta cu e huur di edificio cada luna ta bay pa un otro empleado. E proposicion aki no a wordo acepta y nan a sigui traha. A sigui haya salario y nan payslip.
Esaki so caba, Corte a bisa den nan e veredicto ta mustra cu e relacion di trabou no a finalisa manera e abogado di e compania a bisa. E situacion reinante, unda cu pa tres luna largo no ta haya nan salario, a haci cu e trahadonan a dicidi di acerca un abogado. Si bay stop di traha riba nan mes, por perde tur cos.
A dicidi di bay Corte unda a pidi pa disolve e acuerdo laboral y otorga compensacion pa tur aña di servicio. E compania Toys 4 Us tambe tabata di acuerdo pa e hendenan aki retira pero sin e compensacion cu nan a pidi.
Corte a analisa e situacion y a bisa cu tur partido por acerca Corte pa kibra un relacion di trabou. Pa esaki mester tin cambio den e circunstancianan laboral cu ta haci cu no por otro. E pregunta ta si mester duna compensacion. Nan tin tres luna sin haya salario y no tin contacto cu e hendenan di e compania. E insiguridad cu di e ultimo tres lunanan y e riesgo cu esaki ta trece cu ne ta core pa cuenta di Toys 4 Us. Y ta haci cu por otorga un compensacion na e trahadonan.
Pa otorga e suma di compensacion a tene cuenta cu diferente circunstancia. Edad di e empleado, e añanan di servicio y e salario cu cada un tabatin. Pero tambe a tene cuenta cu e posicion financiero di Toys 4 Us no ta cos di gaba.
P’esey pa cada empleado e ta diferente. Ta papia aki di dos empleado cu tin 28 aña di servicio; un cu 25 aña di servicio, di 17 aña y esun cu menos ta uno di 12 aña trahando na Toys 4 Us.
Mester bisa cu e compensacion mas halto demanda tabata di 108.750 florin y esun mas abou tabata 48 mil y pico. E suma total demanda tabata 469.206 florin. Na final e compensacion mas halto otorga tabata 82.500 y esun mas abou 35 mil florin. Pero, esaki ta inclui e parti di cessantia tambe. Pues e seis empleadonan hunto mester haya for di Toys 4 Us un suma di 345 mil florin.
Corte a pone un provision special den e decision aki. Mirando cu tur a haya un compensacion mas abou pidi, ta duna nan te dia 27 di juni pa dicidi si ta hala aden nan peticion pa kibra e relacion di trabou. Si haci esey, mester paga e gastonan di procedura te awo cu ta 3 mil florin na gasto di abogado. Si no hal’e aden, ta finalisa e relacionnan di trabou entrante 28 di juni awo cu pago di compensacion y ta parti e gastonan di procedura di igual forma entre e partidonan.
