Yiu ta un regalo di Dios un gran bendicion, y un goso pa bida largo. Hesus a bisa laga e muchanan, y no stroba nan di bin cerca Mi, pasobra e reino di cielo ta pertenece na esunnan manera esaki nan (9 Mateo 19:14).
Tin tres area cu mundialmente ta ataca y cu nos tin cu spierta tur hende, pasobra e asunto ta birando teribel. Ta trata di nos muchanan, matrimonio y famia. E deseo di diabel pa kibra e pilar di mas importante den comunidad cu yama matrimonio y famia ta incomprendibel.
Nos tur sa cu unabes e matrimonio y famia ta kibra, dividi y destrui e yiunan por cay facil den man di e malvado. Pasobra Dios ta demanda di tur mayor pa lanta nan yiunan den caminda di Dios, esey ta para skirbi den Efesionan 6:1-4. Tur educacion mester cuminsa na cas, deber di mayor no ta solamente, provee, financieramente y fisicamente, pero tambe spiritualmente.
Pasobra si nos no hacie e diabel ta coy bentaha riba nos yiunan.
Instrui un mucha den e caminda cu e mester cana, y hasta ora e bira bieu e lo no aparta su mes for di dje (Proverbionan 22:6).
Tin demasiado peligro ta bay rond, pa nos laga nos yiunan ta cana sin proteccion di Dios. Ta nos deber pa siña nos yiunan haci oracion, lesa bijbel, scucha palabra di Dios y tambe canta alabansa.
Di tur banda e enemigo di nos alma, ta busca e muchanan inocente pa destrui, pa saca nan for di chikito for di e caminda di luz y hinca nan den e mundo perverso di scuridad.
E enemigo ta purba tur manera di gaña nos muchanan y tur caminda e noticia ta core con na e scolnan den exterior ta bruha e muchanan su mente tocante di nan sexo. Ta haci uzo di diferente mentira hopi baho bisando na mucha chikito por ehempel bo ta un mucha homber den curpa di muhe y bo ta un mucha muhe den curpa di mucha homber.
Nos tin di wak bon pa e fenomeno aki no dal nos manera Coronavirus, pa nos no haya nos ta contamina cu e asunto aki, pasobra den un poblacion chikito manera nos, e lo ta desastroso.
Contra Coronavirus hende por a bisti tapaboca, uza hand sanitizer y tuma vacuna.
Pero contra e abominacion aki ta solamente e sanger di Cristo y e presencia di Dios den bida di nos yiunan, prome cu nos cuminsa manda nan scol, por salba e situacion.
Es mas tur hende mester a nota e spirito di crueldad cu ta biba bao di hubentud, con lihe nan ta pa mata, con lihe nan ta pa venga y cu casi nan no ta pensa riba pordona mes.
Locual cu nos como hende grandi tabata cana bay antes, awor aki el a bira un punto di pelea, y por yega asina leu cu un simpel insulto por causa morto.
E necesidad di lanta nos yiunan cu e palabra di Dios ta mesun necesario cu cuminda den cas. Y e ta mas necesario cu e telefon. Pasobra ya e adiccion na telefon a bira algo incontrolabel. E enemigo a drenta den e asunto di telefon, cu hopi hoben ta kere cu nan por biba sin hende di cas, basta nan tin nan telefon.
Falta di telefon ta pone hoben bira depresivo, falta di data ta pone nan rabia. Y si e telefon mester perde, e hoben tambe ta perde cabes hunto cu ne.
Ta tempo pa tur mayor realisa, bo no por lanta bo yiu sin Dios.
