Awe Afpakteam a tene un huiszoeking na cas di e taxista Yuraney Toppenberg na Palma Real na Palm Beach. E investigacion tin di haber cu sospecho di labamento di placa.
“Misdaad mag niet lonen, manera ta e lema di Afpakteam”, asina Ministerio Publico a duna di conoce. Esey ta base di e investigacionnan tumando luga, den cual ta verifica entrada y propiedad di ciudadanonan, di cual ta sospecha cu a logra yega na nan di forma ilicito.
Husticia a confirma cu awe mainta trempan a detene dos sospechoso. Ta trata aki di e conocido Yuraney Toppenberg y su pareha Radamel Roy Jimenez procedente di Colombia bou di e apodo “El Gato”.
Den e proceso nan a tuma dos auto den beslag, un Mercedes Benz y e Taxi di Yuraney. Tambe a bay na e garashi na Mahuma y a tuma un boto den beslag. E boto yama Sin Limite. Ta un boto original di Venezuela, pero a pasa Corsou cu ne y despues import’e na Aruba mas o menos algun siman pasa.
Toppenberg y su pareha ta bou vergrootglas di husticia for di basta tempo caba. A yega di detene nan na aeropuerto cu un suma considerabel di dollarnan Mericano. E tempo ey a laga nan bay despues. Probablemente e forma di biba, sin tin un trabou cu por brinda e luhonan aki den bida, lo tin wowo di husticia skerpi riba e pareha aki, cu den pasado a yega di haya nan mes envolvi caba den asunto di droga y/of labamento di placa.
