Dialuna atardi pa mas o menos 4:30 pm a sosode un accidente dilanti e cas Paradera 20. Ta trata aki di un pickup marca color blanco numera A-20517, un otro pickup blanco marca Toyota color blanco numera A- 13005 y un auto marca Isuzu modelo Rodeo color berde, numera A-69405.
Pa un of otro motibo, e Rodeo color berde a baha caminda y bay dal den dos pickup cu tabata staciona banda di caminda. Doñonan di e auto tabata paden di nan cas y ora a sali a topa nan auto kibra y un chauffeur femenino spanta.
E chauffeur femenino a conta cu un auto a bin riba dje y el a perde control. El a bisa cu e ta rumbo pa trabou. E ta bisti den uniform di un restaurant di cuminda rapido.
E compania di seguro a sinti cu e declaracion di e chauffeur femenino no ta cuadra mucho y ta papia poco bruha. A yama polis pa test e señora. E defensor di ley cu a yega na e sitio a scucha declaracion di e señora y despues a lag’e supla pa test si acaso e por ta burachi. Pasobra ta hopi straño cu, un persona rumbo pa trabou, por baha caminda y dal den dos auto staciona asina.
A resulta cu berdad e señora ta betra, pa cual e polis a deten’e mesora y a laga transport’e pa ward’i polis pa un investigacion. Awo e señora, di habla Spaño, tin un problema mas serio. E no a yega su trabou mas, e ta deteni, seguro probablemente lo cubri e daño na e dos autonan y cobr’e bek pasobra el a stuur burachi y….su auto mes tambe a keda basta kibra.
