Un grupo di mas o menos dies persona, mayoria di nan di edad relativamente hoben, a probecha di e evento protocolario riba Plaza Betico Croes, pa demostra nan malcontento pa e forma con Gabinete Wever-Croes II (MEP-RAIZ) ta manehando nos desaroyo y eventual crecemento economico. A yega cu pancarta y borchi den man y bou grito a expresa nan desapunto, entre otro cu ta permiti construccion di mas hotel y ta atrae mas turismo.
“Tabata un demostracion pacifico. Nos a atende mesora, a papia cu e demostrantenan y nan a compromde y a sigui ordo di polis. Nan a haya nan chens pa expresa nan malcontento y cla. Corda bon….e derecho di manifestacion ta ancra den nos constitucion”, asina drs. Ramon Arnhem, Altocomisario di Cuerpo Policial Aruba a bisa despues di e ceremonia protocolario. E mes tambe tabata sinta memey di e invitadonan, na momento cu e protesta a inicia.
E hefe di polis awo tin apenas un aña den funcion, despues cu a hurament’e na augustus 2022. E ta bin for di Hulanda, unda manifestacionnan asina ta normal y ta sosode cu masha frecuencia. El a laga sa di no tin ningun problema cu protesta of manifestacion, basta nan bay ordena. E lo a prefera pa e grupo a avisa prome di e manifestacion pasobra e ora lo por a cera acuerdonan concreto y por a duna nan mas chens pa protesta sin cu ta stroba e evento. Awo cu a yega presenta di sorpresa, tampoco ta problema, pero ta haci cu no tin mucho espacio pa negocia. Ta presenta bo manifiesto y mester move pa e evento, cu si tin permiso, por continua. “Na final nos ta responsabel pa orden publico”, segun Altocomisario Arnhem.
Cu ta trata aki di un grupo chikito, no ta conta, den opinion di e hefe local di polis. Si ta un persona mes, e tambe tin derecho pa expresa su mes si e no ta di acuerdo cu maneho di un pais democratico. De facto, e evento di dialuna mainta riba Plaza Betico Croes mester sirbi como un berdadero “wake up call” pa tur politico, tur partido representa den Parlamento di Aruba, cu tin un desconexion grandi cu e pueblo y specialmente cu e generacion hoben. Mas sigui traha den e forma tradicional y sigui goberna e pais den e rumbo di custumber y sin consulta e hobennan, cu e tipo di protestanan asina lo continua.
Ta un echo cu, no solamente na Aruba, sino tur parti di mundo, hobennan tin cada biaha menos miedo di expresa nan mes y eventualmente bay contra lo tradicional. Ta boga pa tin maneho nobo, basa riba ideologia nobo, menos social, mas pro naturalesa y pa tin un reparticion husto di e prosperidad cu economia ta bin cu ne. Contrario na nan mayorman cu ta prefera keda keto, e hobennan no tin problema pa expresa riba red social y awo tambe den publico.
Tin un tendencia creciente den comunidad, riba un resentimiento contra crecemento economico, construccion di mas hotel, mas desaroyo, mas turismo, etc. Sinembargo, e gruponan contra ta dunando poco alternativa, ora bisa “no more tourism”. Pasobra si deshaci of desminui e industria aki, nos mester di un otro pa reemplas’e. Pa awo, “no more tourism” ta traduci den no mas economia, y tur consecuencia cu esaki por trece cu ne.
Di otro banda, tin un otro grupo cu si ta sostene turismo y su crecemento pero ta prefera pa no bin mas hotel. Nan problema ta cu e infrastructura di nos isla no ta duna pa sigui construi mas hotel grandi y importa mas stranhero pa bin traha den nan. Ta sinti cu Aruba ta aportando na economia di otro paisnan, door di crea cupo di trabou pa nan ciudadanonan, cu fin di luna ta manda parti grandi di nan salario bek pa nan pais natal. Ey ta prefera pa conserva loke nos tin y enfoca mas riba turismo di mas calidad, en bes di enfoca riba cantidad.
E situacion dialuna mainta tabata ironico, pasobra e dos lidernan dirigiendo e gobierno aki, esta Evelyn Wever-Croes y Ursell Arends tabata sinta riba prome fila pa mira e manifestacion. E imagen pa e invitaronan sinta ey, entre nan mandatarionan di nos paisnan ruman den Reino Hulandes, por a mira esun pro turismo y esun cu publicamente a expresa su sosten na e movimiento contra mas hotel y turismo, demostrando e desbalance cu ta existi awendia den seno di e coalicion. Ta bisto pa un y tur cu riba varios tema, entre otro desaroyo turistico y matrimonio di e mesun sexo, tin diferencia grandi di opinion entre MEP y RAIZ.
“Nos ta un pais democratico y manifestacion ta forma parti di nos democracia. Nos t’ey pa garantisa cu tur protesta ta cana trankilo, sin violencia y cu e manifestadonan ta haya un oportunidad husto pa expresa nan mes y entrega nan manifiesto”, asina Ramon Arnhem a finalisa bisando. El a conseha tur grupo cu kier manifesta den futuro, pa tuma contacto cu polis prome pa por garantisa un manifestacion organisa y ordena.
