E aña akí ta hasi 70 aña ku a introdusí derecho di voto universal den nos pais. Señora Helga Mensing, èks miembro i èks luchadó di e ala femenina di Partido Nashonal di Pueblo (PNP), próksimamente lo lanta un komishon pa konmemorá e hecho históriko akí na un manera apropiá. Entre otro lo tresé bou di atenshon di generashonnan mas hóben ku tin ora ta mira elekshon komo algu natural na kua nan ta partisipá si nan ke. Ademas sra. Mensing ke honra e grupo di dama progresivo ku na 1948 a pèrkurá pa hende muhé tambe tuma parti den e derecho di voto universal ku a introdusí mas lat e aña ei.
Den e ala femenina di PNP e damanan akí tabata konosí komo Damanan di Djarason, probablemente komo esei tabata e dia di siman ku ta kumbiní amanan di kas mas pa aktividat pafó di kas. Bou di sirkunstanshanan difísil manera kamindanan skur i den hopi mal estado, nan a bishitá kas pa kas rònt Kòrsou pa pidi hende muhénan firma un petishon na e minister presidente Hulandes di e tempu ei, dr. Louis Beel. Den e karta, firmá pa 1013 hende muhé, ta pará entre otro (tradusí for di Hulandes pa Papiamentu):
“Nos no ta mira pakiko lo por nenga òf limitá nos derecho di voto aktivo òf pasivo di kualke forma; komo tur pais sivilisá na mundu ya ta rekonosé emansipashon kompleto di hende muhé, nos no ke keda atras aki na Kòrsou”.
Por haña e teksto kompleto na Archivo Nashonal i tambe via https://alexdavidrosaria.blog di sr. Alex Rosaria, èks miembro di Staten, èks minister di Asuntu Ekonómiko, i aktual funshonario di implementashon pa Nashonnan Uní. “Alex Rosaria a hala mi atenshon riba e hecho históriko akí,” sra. Helga Mensing ta bisa. “Nos ta di akuerdo ku otro ku no mester laga e parti akí di nos historia pasa bai sin dun’é su debido atenshon.”
