Gobièrnu di Kòrsou a anunsiá un pakete di medida pa asina sania e situashon finansiero prekario ku nos pais ta pasando aden aktualmente. Gobièrnu a laga un komishon hasi un ‘doorlichting’ di e presupuesto di 2019 i resultado ta ku no tin espasio pa sigui baha mas gastu i ku mester tuma algun medida pa kubri e défisit di 127 mion.
Entre e medidanan, Gobièrnu a proponé pa oumentá OB di 6% pa 9% pero tambe na mes momentu ta trahando riba un trayekto pa por baha Loonbelasting i introdusí bèk e “aftrekpost” di mantenshon di kas. Tambe Gobièrnu ke introdusí un “Sugartax” riba produktonan ku ta kontené hopi suku i tambe oumento di accijns riba sigaria, serbes i alkohòl.
Nos ta sostené minister di Finansa, señor Kenneth Gijsbertha i Gabinete Ruggenaath pa kana e trayekto di reformanan fiskal i medidanan aki. Mirando e situashon finansiero ku nos pais ta pasando aden últimamente i medidanan ku mester keda tumá ku lo afektá hinter nos komunidat, frakshon di MAN ta di opinion ku nos komo Parlamentarionan mester ta promé yamá pa mustra solidaridat ku pueblo di Kòrsou. P’esei Parlamentarionan di Frakshon di MAN ta dispuesto pa entregá 10% di nan salario komo muestra di solidarismo ku nos pueblo. P’asina por yuda ku un granito na e totalidat. Frakshon di MAN ta di opinion ku no ta komunidat so mester “entregá”. Ta nos tur mester karga ku e situashon ku nos pais ta pasando aden. Si bo ke drecha mundu kuminsá na bo mes. Den un reunion públiko dia 11 mart 2019 den kual Minister di Finansa a bin parlamento pa ilustrá kiko ta status di nos situashon finansiero, frakshon di MAN a presentá su deseo den un moshon kaminda ta proponé pa kada parlamentario entregá te ku 10% di nan salario. E moshon aki e ser rechasá pa Parlamento.
