Dialuna anochi den e captain room di Casa del Mar Comite Olimpico Arubano (COA) a tene un anochi ameno y masha special, unda a celebra e ceremonia di despedida di e delegacion hubenil cu otro siman lo sali pa e Weganan Sur Americano Hubenil di Santiago, Chile 2017.
Na e ocasion aki tabata presente, nuebe di e diezun atletanan y e coachnan, Minister di
Deporte Dr. Alex Schwengle, miembronan di directiva di COA, e diferente comisionnan di COA, mayornan, federacionnan, invitadonan special y miembronan di Prensa. Presidente di COA, Sr. Roy Mezas y Secretaria General di COA, Sra. Nicole Hoevertsz y Minister di Deporte, Dr. Alex Schwengle a dirigi algun palabra na esnan presente unda a splica riba e importancia cu e weganan lo ta pa e delegacion cu pa prome biaha lo competi na un magno evento manera di Weganan Sur Americano Hubenil. E impacto lo ta uno cu cada atleta lo keda
recorda pa semper den nan bida. E no lo bay ta facil mirando e nivel halto di competencia, pero cu motivacion y e gana di demostra lo maximo no tin duda cu nos atletanan lo briya na dicho weganan. A lo largo ta e 11 miho atletanan hubenil lo representa Aruba. E 11 atleta representando 5 deporte cu lo bataya contra e mihor atletanan hubenil di e continente Sur America bou di e nomber di Team Aruba ta consisti di e landadonan Keeley Maduro, Anahi Schreuders, Brandon Cheong y Daniel Jacobs(ambos na Merca), e judoka Sophia Petrocchi, e taekwondista Chiara Petrocchi, e tri-atleta Giannon Eights, tenistanan di mesa Ching Ho Chung y Jeandry Mathilda y e tenistanan di cancha Frederick Sydow y Patrick Sydow.
Hefe di Mision, Kamilah Dammers Naddall a duna informacion general di e biahe di e delegacion y e reglanan cu mester tene cuenta cune na Chile durante di e un siman y mei na Santiago. Por ultimo, e atleta di Taekwondo, Chiara Petrocchi a wordo nombra como abanderado, e lo bira e persona cu lo carga e bandera di nos pais durante e ceremonia di apertura di e Weganan Sur Americano Hubenil na Santiago de Chile. Minister Schwengle a pasa e bandera do Aruba na presidente di COA, Roy Mezas cu den su turno a pasa esaki na hefe di mision, Kamilah Dammers- Naddall cu por ultimo a pasa esaki na atleta Chiara Petrocchi. COA ta desea cada un di e integrantenan di e delegacion pa e Sur Americano Hubenil tur clase di exito y lo sigui nan pasonan di cerca, manteniendo pueblo di Aruba na haltura na tur momento.
