Diahuebs anochi a tuma luga na Papiamento restaurant un ceremonia special pa asina reconoce 34 miembro policial di Aruba. Agentenan cu a bai yuda nos hermana isla Sint Maarten despues cu Horcan Irma a azota e isla.
Ministro di Husticia di Sint Maarten a pidi ayudo na Aruba y Cuerpo Policial Aruba no a pensa 2 biaha y a manda un ekipo di 34 agente policial, parti den dos ekipo durante lunanan September y October di 2017. Tabata un experiencia bibo con nan a mira nos isla ruman distrui a causa di un horcan asina devastador manera cu Irma tabata.
Awe 1 aña despues, den un ocasion special, Ministro di Husticia di Sint Maarten Sr. Hugh de Weever a bin Aruba pa asina duna reconocemento na e 34 agente di Aruba personalmente. Den man di Minister Bikker y de Weever a duna cada polis un medaya pa honra nan pa nan balentia, curashi y boluntad pa yuda reestablece orden publico y duna un man na e comunidad di Sint Maarten.
Den presencia di Minister di Husticia di Aruba Sr. Andin Bikker, Gezaghebber di Boneiro Sr. Edison Rijna, representante di Minister di Husticia di Curacao Desiree Lai-Promes y alto comisario Sr. Andrew Hoo tabata presente pa mira nos agentenan policial wordo honra na e ocasion special aki.
Aruba lo sigui yuda nos islanan ruman den cualkier necesidad y calamidad. Hunto nos ta un Reino Hulandes.
