Ministerio di Desaroyo Ekonómiko ta konsiderá e industria di sine komo un pilá ekonómiko nobo pa nos país. Pa por desaroyá e industria aki Ministerio di Desaroyo Ekonómiko resientemente a kontratá un komisario pa industria di sine.
Sra. Eloise van Wickeren ta nasí i kria na Kòrsou i despues di a gradua komo Master den Media i Kultura (Media en Cultuur) na Universidat di Amsterdam, el a atkirí e eksperensia nesesario den e industria di sine. For di aña 2010 e ta bèk na su pais natal i a traha entre otro na e pelikula ‘Tula: the Revolt’ i resientemente ‘Double Play’.
E komisario pa industria di sine lo bai traha huntu ku otro partnernan den e sektor i tambe ku tur e instansianan konserní pa por mehorá i krese e industria di sine na Kòrsou ku a lo largu por bai ofresé un tratamentu preferenshal (Red Carpet Treament) na produktornan di sine lokal i internashonal.
E meta final ta pa promové Kòrsou den eksterior komo e lugá adekua pa hasi filmashon i asina atrae mas produkshonnan internashonal na nos pais.
Esaki lo trese mas trabou di forma dirèkt i indirèkt pa e sektor aki i además lo tin un impakto ekonómiko konsiderabel pa nos ekonomia lokal.
Pa por hasi e tratamentu preferenshal (Red Carpet treatment) posibel tin algun regla i prosedura ku tin ku keda adaptá konforme e nesesidatnan di e industria di sine. Den e periodo binidero esaki lo keda analisá i desaroyá huntu ku tur e partnernan den e sektor.
Tambe lo wak e posibilidatnan ku tin pa por ofresé sierto insentivonan, sea finansiero òf no, ku ta bai hasi Kòrsou atraktivo pa produktornan internashonal bini Kòrsou ku nan produkshonnan.
Ademas lo duna hopi atenshon na estudio i formashon den e sektor. Ta di sumo importansia pa prepará i formá talentonan lokal pa asina Kòrsou por krea un base fuerte di personanan ku por fungí komo ekipo di sine i asina yuda sostené produkshonan lokal i internashonal.
