Tabata promer cu 8’or di diadomingo anochi cu Polis a haya yamada pa bai na un cas na Cochinilla na Santa Cruz. Segun informe un tata a yega cas burachi y cuminsa bringa cu tur hende na cas.
Mirando cu e situacion tabata sali for di control a yama Polis pa duna asistencia. Polis a yega rapidamente pa atende cu e situacion, pero pa nan gran sorpresa ora di bay pa detene e tata, ata e mesun famia cu a yama Polis, a cuminsa lanta cu Polis. Mesora a pidi refuerso y den un rato di ora mas patruya a yega.
Situacion tabata basta tenso na e luga, pero cu ayudo cu e demas coleganan di Polis, a sa di domina e sitiuacion. A hiba e detenido pa warda di Polis, mientras e demas Polis a keda un rato mas pa asina calma tur hende.
