Diadomingo den careda di 9’or di anochi, varios Polis a bay cu maximo urgencia pa reforsa nan coleganan na e luga net pabou di warda di Playa cu yama “Zona Zero”. Segun por a compronde di algun persona eybanda, a start un pelea formal den e luga cu a sigui te parti pafo di e club.
Varios patruya di Polis a yega mesora na e club y for di warda tamba varios agente policial a sali na careda pa brinda asistencia. A topa cu un situacion hopi tenso y un multitud grandi pafo riba caya dilanti e lugar. Polis a haci varios detencion y un di esnan deteni tabata basta herida y cu ambulance su presencia a wordo pidi.
Ora a kere cu cos a caba, atrobe a start un bululu den e cayanan rondona di e lugar Zona Zero. Mesora varios Polis a bolbe presenta y a haci un detencion mas. Mirando e situacion chaotico y e multitud di hende, Polis a saca tur hende for di e luga y a laga nan sera e luga. Esnan riba caya ainda a haya instruccion di Polis pa bandona e sitio.