Mientras tiradonan di pisca ta wardando e siman aki pa nan prome permiso pa tira pisca, tin cu ta causando problema concientemente. Personal di Kustwacht durante nan control riba lama a topa cu un homber den lama cerca di beach cerca di Strand Politie. E tabata basta cerca di tera. E tabata tin un paña di duik bisti.
E personal riba boto di Kustwacht a purba yega mas cerca posibel di dje pa asina puntre kico e ta haciendo. El a contesta cu e ta pasando un rato agradable cu su famia na lama. Ora cu e personal di Kustwacht a puntre unda e scopet di awa tira pisca ta, e homber a laga tur cos cay den awa y sali na careda.
E personal di Kustwacht no por a yega mas cerca di tera cu nan boto pasobra tin poco profundidad. Nan a baha den awa y bay unda e homber tabata. Eynan a bin topa cu e scopet di tira pisca y tambe a topa cu algun pisca chikito cu el a tira. Comportacionnan asina ta netamente loke ta perhudica e grupo di tirado di pisca cu ta luchando añanan largo pa por haya un permiso pa tira den areanan cu no ta peligroso pa coral y otro landadornan.
Pesey mes e intencion di gobierno y specificamente minister Andin Bikker ta pa yuda e tiradonan cu ta tira pisca pa nan mes por come of bende pa biba. E caso unda e tirado diadomingo atardi a core bay laga scopet atras tabata banda di Divi Phoenix. Un tirado di pisca cu haya permiso y comete algo asina, ta perde su permiso mesora. Pesey mes cada uno ta conciente di e area cu nan mag tira.
