E crisis cu nos ta bibando aden relaciona cu Covid-19, a trece cu ne un incertidumbre caminda hopi mas hende den nos comunidad ta pasando den momentonan dificil.
Desde inicio di e crisis Sociaal Crisisplan (SCP) a bin ta nota cu tin hopi peticion ta drenta via diferente plataforma di comunicacion pa informacion of guia tocante ayudo den caso di negligencia, ayudo pa cuminda, ayudo financiero, ayudo pa asistencia di salud mental y otro preocupacionnan tocante salud en general y miembro di famia.
Awo por haya tur e informacionnan aki riba un solo website www.scparuba.com. Pa esnan cu no sa unda pa bay of cerca ken pa acudi pa ayudo por bishita e website pa haya tur informacion. Alabes, por manda mensahenan directo pa SCP pa cualkier pregunta of informacion.
Pa ayudo den caso di abuso, negligencia of violencia.
Bureau Sostenemi tin su ekipo di profesionalnan cu ta atende cu casonan di emergencia di abuso di mucha. Pa informacion preventivo tocante abuso y negligencia di mucha por acudi tambe na Fundacion Respeta Mi. Fundacion Hende Muhe den Dificultad ta trahando tur dia pa por atende cu casonan di violencia domestico. Por haya mas informacion ariba www.scparuba.com.
Pa ayudo di cuminda.
Diferente instancia y fundacion ta trahando duro pa asina tur famia den necesidad por haya e ayudo di cuminda. Instancianan manera Departamento di Asunto Social, Rode Kruis Aruba, Fundacion Pa Nos Comunidad y Ajudo na Aruba #Covid19 ta algun pa menciona cu ta traha pa yuda esnan den necesidad cu cuminda. Pa acudi pa ayudo di cuminda por bishita e website www.scparuba.com pa yena un formulario digital. E peticion lo bay directamente pa Departamento di Asunto Social cu lo procesa e peticion y intermedia cu instancianan directo. Riba e website por haya mas informacion di e organisacionnan cu ta duna ayudo cu cuminda.
Pa ayudo cu salud mental.
Ora nos ta papia di salud mental nos ta papia di stress, ansiedad, soledad, depresion y hasta tendencianan violento cu un persona por experencia. E crisis aki por afecta bo salud mental y ta pesey e ta hopi importante pa bo ta atento na bo sentimentonan y con bo por maneha esaki. Riba e website di SCP por haya informacion di diferente instancia cu ta trahando tur dia pa asina por brinda esnan cu ta sinti hopi stress, ansiedad y preocupacion e ayudo y sosten cu nan tin mester. Por acudi pa haya asistencia door di yena un formulario digital pa asina haya contacto bek.
E website ta brinda alabes informacion pa cu ayudo financiero, alivio fiscal, Sociaal Crisisplan su socionan como tambe un pagina special dedica na duna informacion cu ta cubri diferente topico. www.scparuba.com ta un solo plataforma caminda por haya hopi informacion cu ta relevante pa e situacionnan dificil.
