En conexion cu flexibilisacion di medida pa combati COVID-19, nos di Departamento di Impuesto a start cu fase 2 pa loke ta e distribucion di plachi di number 2020.
Fase 2 ta encera cu e contribuyente/doño di plachi di number por selecta un di e companianan local certifica pa Departamento di Impuesto pa servicio di ‘delivery’ di plachinan di number. Awor e contribuyentenan por selecciona nan servicio di entrega segun e prijs cu ta desea di paga, rapidez y prioridad di servicio desea.
Cua compania lo ta cooperando cu Departamento di Impuesto?
Di acuerdo cu nos procedura, reglanan y acuerdo di cooperacion, nos ta anuncia cu e companianan di ‘delivery’ cu ta autorisa y certifica pa busca plachi di number cerca nos y haci e entrega ta:
- Post Aruba
- All U Need Delivery
- Fast Delivery Services
- Pick It Up Service
Nos ta yama bonbini na cada un di e companianan aki y nos ta satisfecho cu e bon entendimento di e proceduranan rekeri ora ta trata e distribucion di e plach’i numbernan 2020.
Trece un balansa
Cada un di e companianan aki tin nan experticio y base di clientela y ta brinda e balansa den volumen, rapidez y calidad di servicio tambe na nos contribuyentenan local entre otro nos pensionadonan. Bo por scoge pa un compania grandi of uno menos grandi evaluando alabes e rapidez di servicio y e prijs cu nan ta ofrece. Balansa y calidad di servicio ta na prome lugar.
Servicio ofreci no ta obligatorio
Alabes nos ta anuncia enfaticamente, cu e servicio cu e companianan di ‘delivery’ aki ta ofrece NO ta obligatorio pero si necesario si un cliente kier ricibi su plach’i number awor. Nos tin cu tene cuenta cu e medidanan di precaucion di contagio cu Corona virus y ta conciente cu nos lo mester traha na un manera diferente ora ta trata otorgamento di e plachinan menciona. E ta un opcion na esnan cu ta desea di haci uzo di e servicio aki y ta completamente segun e reglanan vigente di prevencion di contagio.
Fase 3
E contribuyente cu ta prefera di warda y para un poco mas den rij, lo por acudi cerca nos asina cu nos cuminsa cu fase 3 ora cu e medidanan di “Shelter in Place” wordo elimina. Den fase 3 nos lo bay otorga e plachinan na e personanan individual cu no a ricibi nan plachinan den fase 1 y 2. Comienso di fase 3 ta depende di e medidanan relaciona cu Covid-19 y e decision di autoridadnan concerni riba e tereno aki.
Lamentablemente ainda nos no por yuda e personanan individual cu aworaki ta acudi cerca nos pa busca e plachinan.
Di e forma aki nos ta spera di por facilita un gran parti di nos contribuyentenan pa asina nan por ricibi nan plachinan di number na un manera structura y sigur, garantisando servicio di calidad, mientras cu nos ta cumpli cu e medidanan relaciona cu Covid-19.
